మమతా బెనర్జీ కుటుంబంలో విషాదం.. 28 ఏళ్ల మేనకోడలు అనుమానాస్పద మృతి

పశ్చిమ బెంగాల్‌ మాజీ ముఖ్యమంత్రి మమతా బెనర్జీ మేనకోడలు బిర్భూమ్‌ జిల్లాలో అనుమానాస్పద రీతిలో మృతి చెందారు. 28 ఏళ్ల బృష్టి ముఖర్జీ ఘటక్‌ మృతదేహాన్ని రామ్‌పూర్‌హాట్‌లోని ఆమె ఇంట్లో పోలీసులు మంగళవారం గుర్తించారు. ఇంటి రెండో అంతస్తులోని ఓ గదిలో మధ్యాహ్నం మృతదేహం కనిపించడం కలకలం రేపింది.

సమాచారం అందుకున్న పోలీసులు మృతదేహాన్ని రామ్‌పూర్‌హాట్‌ ప్రభుత్వ ఆసుపత్రికి తరలించారు. అక్కడ పోస్టుమార్టం నిర్వహించనున్నారు. ఆమె మృతికి గల కారణం ఇంకా స్పష్టంగా తెలియలేదని పోలీసు అధికారి తెలిపారు. పోస్టుమార్టం నివేదిక తర్వాత మరిన్ని వివరాలు తెలిసే అవకాశం ఉంది.

కుటుంబ సభ్యుల సమాచారం ప్రకారం.. బృష్టి కొంతకాలంగా డిప్రెషన్‌తో బాధపడుతున్నారు. దీనికి చికిత్స కూడా తీసుకుంటున్నారు. మరోవైపు భర్తతో ఆమెకు విడాకుల ప్రక్రియ కొనసాగుతున్నట్లు సమాచారం. అయితే ఆమె మృతికి ఇవే కారణమని పోలీసులు నిర్ధారించలేదు.

బృష్టి గతంలో ఉపాధ్యాయ నియామక వ్యవహారంలో ఆరోపణలు ఎదుర్కొన్నారు. అక్రమంగా ప్రభుత్వ పాఠశాలలో ఉద్యోగం పొందారనే ఆరోపణలు వచ్చాయి. నియామకాల్లో అవకతవకలు జరిగినట్లు తేలడంతో ప్రభుత్వ సాయంతో నడిచే పాఠశాలల్లో నియామకాలను రద్దు చేస్తూ సుప్రీంకోర్టు ఆదేశాలు ఇచ్చింది. దీంతో ఆమె ఉద్యోగాన్ని కోల్పోయినట్లు కుటుంబ సభ్యులు తెలిపారు.

బృష్టి మృతిపై పోలీసులు దర్యాప్తు ప్రారంభించారు. ఆమె మృతికి గల కారణాన్ని తేల్చే పనిలో ఉన్నారు.

బిర్భూమ్‌లో మరో టీఎంసీ నేత మృతి ఘటన జరిగిన కొన్ని రోజులకే ఈ ఘటన చోటుచేసుకుంది. మాజీ ఎమ్మెల్యే, పశ్చిమ బెంగాల్‌ అసెంబ్లీ మాజీ డిప్యూటీ స్పీకర్‌ ఆశిష్‌ బెనర్జీ ఆగస్టు 16న రామ్‌పూర్‌హాట్‌లోని పార్టీ కార్యాలయంలో ఉరేసుకున్న స్థితిలో కనిపించారు. ఐదుసార్లు ఎమ్మెల్యేగా పనిచేసిన ఆయన ఓ సూసైడ్‌ నోట్‌ వదిలినట్లు పోలీసులు తెలిపారు. అందులో అవినీతి ఆరోపణలను ఆయన ఖండించినట్లు సమాచారం.