రష్మిక మందన్న ఫ్యాన్స్‌కు గుడ్‌న్యూస్‌.. ‘మైసా’ రిలీజ్‌ డేట్‌ వచ్చేసింది!

నటి రష్మిక మందన్న అభిమానులకు గుడ్‌న్యూస్‌. ఆమె ప్రధాన పాత్రలో నటిస్తున్న యాక్షన్‌ థ్రిల్లర్‌ ‘మైసా’ విడుదల తేదీ ఖరారైంది. ఈ ఏడాది నవంబర్‌ 27న ప్రపంచవ్యాప్తంగా ఈ చిత్రాన్ని థియేటర్లలో విడుదల చేయనున్నట్లు చిత్రబృందం మంగళవారం ప్రకటించింది.

దర్శకుడు రవీంద్ర పుల్లె తెరకెక్కిస్తున్న ఈ చిత్రాన్ని ‘అన్‌ఫార్ములా ఫిల్మ్స్‌’ నిర్మిస్తోంది. సోషల్‌ మీడియా వేదికగా విడుదల తేదీని ప్రకటించిన చిత్రబృందం.. రష్మికను ఇంతకుముందెన్నడూ చూడని కొత్త రూపంలో ప్రేక్షకులు చూడబోతున్నారని పేర్కొంది.

ఇటీవల ‘మైసా’ షూటింగ్‌లో కీలకమైన అండర్‌వాటర్‌ యాక్షన్‌ సీక్వెన్స్‌ను పూర్తి చేశారు. రష్మిక పాల్గొన్న ఈ సన్నివేశం చిత్రానికి ప్రత్యేక ఆకర్షణగా నిలవనుందని తెలుస్తోంది. ఈ విషయాన్ని నిర్మాత అజయ్‌ సాయిపురెడ్డి కూడా సోషల్‌ మీడియా ద్వారా వెల్లడించారు.

కేరళలోనూ సినిమా కోసం సుదీర్ఘ షెడ్యూల్‌ను చిత్రబృందం పూర్తి చేసింది. ఈ షెడ్యూల్‌లో భారీ యాక్షన్‌ సన్నివేశాలను తెరకెక్కించారు. స్టంట్‌ మాస్టర్‌ కెచా ఖంపక్డీ ఈ యాక్షన్‌ సన్నివేశాలకు కొరియోగ్రఫీ చేశారు. రష్మిక కూడా ఈ సన్నివేశాల్లో కీలకంగా పాల్గొన్నట్లు సమాచారం.

‘మైసా’లో రష్మిక గిరిజన గోండ్‌ యువతి పాత్రలో కనిపించనున్నారు. భావోద్వేగాలతో పాటు శారీరకంగా కఠినమైన యాక్షన్‌ సన్నివేశాలు చేయాల్సిన పాత్ర కావడంతో ఆమె ప్రత్యేక శిక్షణ తీసుకున్నారు. థాయ్‌లాండ్‌లోని బ్యాంకాక్‌లో నిర్వహించిన స్టంట్‌, కంబాట్‌ బూట్‌క్యాంప్‌లో ఆమె శిక్షణ పొందారు. రోజుకు ఎనిమిది గంటలకు పైగా సాధన చేసినట్లు చిత్రబృందం తెలిపింది.

ఈ సినిమాలో ఈశ్వరీరావు, గురు సోమసుందరం, రావు రమేశ్‌ కీలక పాత్రల్లో నటిస్తున్నారు. శ్రేయాస్‌ పి.కృష్ణ సినిమాటోగ్రఫీ అందిస్తున్నారు. జేక్స్‌ బెజోయ్‌ సంగీతం సమకూరుస్తున్నారు. అంతర్జాతీయ స్టంట్‌ కొరియోగ్రాఫర్‌ ఆండీ లాంగ్‌ యాక్షన్‌ సన్నివేశాలను పర్యవేక్షిస్తున్నారు.