రాఖీ యాడ్ వివాదం: తనదైన స్టైల్‌లో కృతి సనన్ కౌంటర్!

రక్షా బంధన్ సందర్భంగా ఒక యాడ్‌లో ధరించిన దుస్తుల విషయంలో తనపై వచ్చిన విమర్శలకు, ట్రోలింగ్‌కు బాలీవుడ్ నటి కృతి సనన్ తనదైన శైలిలో బదులిచ్చారు. సోషల్ మీడియాలోని ‘ఫ్యాషన్ కమిటీ’కి సున్నితంగా చురకలంటిస్తూ, పండగ స్ఫూర్తి అంటే ఏమిటో స్పష్టం చేశారు.

శుక్రవారం, కృతి సనన్ తన ఇన్‌స్టాగ్రామ్ ఖాతాలో ఒక ఫోటోను పంచుకున్నారు. అందులో తన సోదరి నుపుర్ సనన్‌తో కలిసి చేతులకు రాఖీలు కట్టుకుని కనిపించారు. ఈ ఫోటోకు ఆమె ఒక ఆసక్తికరమైన క్యాప్షన్ జోడించారు. "రాఖీ ఫ్యాషన్ కమిటీ ఇంకా చర్చలు జరుపుతూ ఉండగానే... మేము మాత్రం నిజంగా ముఖ్యమైన వాటిపై దృష్టి పెడుతున్నాం. అందరికీ రక్షా బంధన్ శుభాకాంక్షలు" అంటూ పోస్ట్ చేశారు. ఈ పోస్ట్‌కు నెటిజన్ల నుంచి పెద్ద ఎత్తున మద్దతు లభించింది. ట్రోల్స్‌కు ఇదే సరైన సమాధానం అంటూ పలువురు కామెంట్లు చేశారు.

అసలేం జరిగింది?

ప్రముఖ జ్యువెలరీ బ్రాండ్ ‘గీవా’ రక్షా బంధన్ కోసం రూపొందించిన ఒక ప్రకటనలో కృతి సనన్ నటించారు. ఈ యాడ్‌లో ఆమె ఆఫ్-వైట్ కలర్ బ్రాలెట్ స్టైల్ బ్లౌజ్, కేప్, డ్రెప్డ్ స్కర్ట్‌తో కనిపించారు. అయితే, పవిత్రమైన పండగ రోజున ఇలాంటి దుస్తులు ధరించడం భారతీయ సంప్రదాయాలకు విరుద్ధమంటూ సోషల్ మీడియాలో కొందరు తీవ్రంగా విమర్శించారు. ఈ వ్యతిరేకత కారణంగా సదరు బ్రాండ్ ఆ యాడ్‌ను ఉపసంహరించుకుంది.

ఈ వివాదంపై కృతి గతంలోనూ ఒక నోట్ ద్వారా స్పందించారు. "పండగల సారాంశం మనం వేసుకునే బట్టల్లో కాదు, ఆ సంప్రదాయాలకు మనం ఇచ్చే భావోద్వేగాలు, అర్థంలో ఉంటుంది. రక్షా బంధన్ అంటే ఒక రక్షణ బంధం. నేను, మా చెల్లి ఒకరికొకరం రాఖీ కట్టుకుంటాం. ఒక సోదరుడిలాగే ఒకరినొకరు రక్షించుకోగలమని మాకు తెలుసు. ఈ బంధం మా పెంపుడు కుక్కలకు కూడా వర్తిస్తుంది, ఎందుకంటే అవి కూడా మా కుటుంబమే," అని పేర్కొన్నారు. తాజా పోస్ట్‌తో ఈ వివాదానికి ఆమె ముగింపు పలికినట్లయింది.