నన్ను, నా భార్యను చంపేస్తామంటున్నారు.. పోలీసులను ఆశ్రయించిన సౌరవ్ గంగూలీ

భారత క్రికెట్ జట్టు మాజీ కెప్టెన్, బెంగాల్ క్రికెట్ అసోసియేషన్ (క్యాబ్) అధ్యక్షుడు సౌరవ్ గంగూలీకి తీవ్రమైన బెదిరింపులు ఎదురయ్యాయి. తనను, తన భార్య డోనా గంగూలీని చంపేస్తామంటూ గుర్తుతెలియని వ్యక్తులు హెచ్చరిక లేఖలు పంపారని, దీనిపై దాదా పోలీసులకు ఫిర్యాదు చేశాడు. ఈ ఘటన క్రీడా వర్గాల్లో, కోల్‌కతాలో తీవ్ర కలకలం రేపింది.

సీనియర్ పోలీస్ అధికారి వెల్లడించిన వివరాల ప్రకారం.. గత ఆరు నెలలుగా గంగూలీ పేరు మీద ఈ బెదిరింపు లేఖలు వస్తున్నాయి. అయితే, వాటిని తొలుత అంత సీరియస్‌గా తీసుకోలేదు. కానీ, నిన్న త‌న‌ కార్యాలయానికి అందిన రెండు లేఖల్లో "నిన్ను, నీ భార్యను చంపేస్తాం. నీకు సన్నిహితంగా ఉండేవారికి హాని తలపెడతాం" అని స్పష్టంగా ఉండటంతో గంగూలీ అప్రమత్తమయ్యాడు. వెంటనే తన మేనేజర్ ద్వారా కోల్‌కతాలోని ఠాకూర్‌పుకుర్ పోలీస్ స్టేషన్‌లో లిఖితపూర్వకంగా ఫిర్యాదు చేయించాడు.

గంగూలీ ఫిర్యాదును తీవ్రంగా పరిగణిస్తున్నామని, వెంటనే దర్యాప్తు ప్రారంభించామని పోలీసులు తెలిపారు. ఈ లేఖల మూలాలను, వాటిని పంపిన వారిని గుర్తించేందుకు ప్రయత్నిస్తున్నామని వెల్లడించారు. లేఖల కంటెంట్‌తో పాటు వాటిని పంపిన విధానంపై కూడా ప్రత్యేకంగా దృష్టి సారించినట్టు ఓ అధికారి వివరించారు. ఈ లేఖలన్నీ ఒకే వ్యక్తి పంపాడా? లేక దీని వెనుక ఇంకెవరైనా ఉన్నారా? అనే కోణంలో దర్యాప్తు చేస్తున్నారు.

ప్రాథమిక విచారణలో కీలక సమాచారం లభించినట్టు తెలుస్తోంది. ఉత్తర 24 పరగణాల జిల్లాలోని బెల్ఘరియా ప్రాంతానికి చెందిన ఓ వ్యక్తి కొరియర్ సర్వీస్ ద్వారా ఈ లేఖలను పంపి ఉండవచ్చని పోలీసులు అనుమానిస్తున్నారు. నిందితుడు వాడినట్లుగా భావిస్తున్న సిమ్ కార్డు కదలికలను పోలీసులు పరిశీలిస్తున్నారు. ఇప్పటికే సంబంధిత కొరియర్ ఏజెన్సీని సంప్రదించి, లేఖల పంపిణీకి సంబంధించిన వివరాలు సేకరిస్తున్నారు. కొరియర్ సిబ్బంది నుంచి ఒక మొబైల్ నంబర్‌ను గుర్తించామని, దాన్ని ట్రేస్ చేసే పనిలో ఉన్నామని పోలీసులు పేర్కొన్నారు. ఈ బెదిరింపుల వెనుక ఉన్న అసలు కారణాన్ని త్వరలోనే నిగ్గు తేలుస్తామని వారు ధీమా వ్యక్తం చేస్తున్నారు.