చూస్తుండగానే నదిలో బాలుడిని లాక్కెళ్లి చంపేసిన మొసలి.. వీడియోలో రికార్డైన భయాన‌క‌ దృశ్యాలు!

ఉత్తరప్రదేశ్‌లో విషాదం చోటుచేసుకుంది. నది ఒడ్డున చేతులు, ముఖం కడుక్కుంటున్న 12 ఏళ్ల బాలుడిపై ఓ భారీ మొసలి దాడి చేసి, నీటిలోకి లాక్కెళ్లి చంపేసింది. బహ్రైచ్ జిల్లాలో గురువారం సాయంత్రం ఈ హృదయ విదారక ఘటన జ‌రిగింది. ఈ ఘటన స్థానికంగా తీవ్ర భయాందోళనలను సృష్టించింది.

అస‌లేం జ‌రిగిందంటే..!
సునీల్ సింగ్ (12) అనే బాలుడు తన మామ విజయ్ రాజ్ సింగ్‌తో కలిసి వరి నాట్లు వేసేందుకు పొలానికి వెళ్లాడు. పని ముగించుకుని ఇంటికి తిరిగి వస్తుండగా, సమీపంలోని ఘాఘరా నది ఒడ్డుకు చేతులు, కాళ్లు శుభ్రం చేసుకోవడానికి వెళ్లాడు. ఆ సమయంలో నీటిలో నక్కి ఉన్న ఓ మొసలి అకస్మాత్తుగా సునీల్‌పై దాడి చేసి, నదిలోకి లాక్కెళ్లింది.

కళ్లెదుటే మేనల్లుడిని మొసలి లాక్కెళ్లడం చూసిన విజయ్ రాజ్ సింగ్ వెంటనే నదిలోకి దూకి అతడిని కాపాడేందుకు ప్రయత్నించారు. అక్కడున్న గ్రామస్థులు కూడా సహాయం చేయడానికి ముందుకు వచ్చారు. కానీ, ఆ మొసలి బలం ముందు వారి ప్రయత్నాలు విఫలమయ్యాయి. బాలుడిని అది నదిలో మరింత లోపలికి లాక్కెళ్లింది.

ఈ ఘటన గురించి విజయ్ రాజ్ సింగ్ ఆవేదనతో మాట్లాడుతూ.. "నేను వెంటనే నదిలోకి దూకి వాడి చేతిని పట్టుకున్నాను. సుమారు ఏడు నిమిషాల పాటు వాడిని వెనక్కి లాగేందుకు ప్రయత్నించాను. కానీ, ఆ మొసలి చాలా బలంగా ఉంది. వాడిని లోతైన నీళ్లలోకి లాక్కెళ్లిపోయింది. నేను వాడిని కాపాడుకోలేకపోయాను" అని కన్నీటిపర్యంతమయ్యారు.

గ్రామస్థులు చాలాసేపు గాలించిన తర్వాత రాత్రి 10 గంటల సమయంలో సునీల్ మృతదేహాన్ని నది నుంచి వెలికితీశారు. అయితే, అప్పటికే మొసలి బాలుడి శరీరాన్ని పాక్షికంగా తినేసిందని అటవీ శాఖ అధికారులు తెలిపారు. "మృతుడి నడుము కింది భాగాన్ని మొసలి తినేసింది" అని ఫారెస్ట్ రేంజర్ సాఖిబ్ అన్సారీ పేర్కొన్నారు.

సునీల్ 6వ తరగతి చదువుతున్నాడు. తల్లిదండ్రులిద్దరినీ కోల్పోయిన అతను, తన మామతో కలిసి జీవిస్తున్నాడు. ఈ బాలుడి మరణంతో ఆ కుటుంబంలో తీరని విషాదం నెలకొంది. పోలీసులు మృతదేహాన్ని పోస్టుమార్టం నిమిత్తం తరలించారు. బాధిత కుటుంబానికి ప్రభుత్వ సహాయ పథకం కింద రూ.4 లక్షల పరిహారం అందజేస్తామని సబ్-డివిజనల్ మేజిస్ట్రేట్ ప్రకాశ్ సింగ్ ప్రకటించారు.

ఇటీవల కాలంలో ఇలాంటి ఘటనలు తరచూ జరుగుతున్నాయి. గత మే నెలలో గుజరాత్‌లోని వడోదర జిల్లాలో కూడా ఇలాంటి ఘటనే జరిగింది. దేవ్ నదిలో నీళ్లు తాగేందుకు వెళ్లిన 22 ఏళ్ల యువకుడిని మొసలి లాక్కెళ్లి చంపేసింది. ఈ వరుస ఘటనలతో నదీ తీర ప్రాంతాల ప్రజలు భయాందోళనలకు గురవుతున్నారు.