బరువు తగ్గడానికి తేనె, గోరువెచ్చని నీరు.. ఈ ఉదయపు అలవాటు నిజంగా పనిచేస్తుందా?

ఉదయాన్నే నిద్ర లేవగానే ఒక గ్లాసు గోరువెచ్చని నీటిలో తేనె కలుపుకుని తాగడం చాలా భారతీయ కుటుంబాల్లో తరతరాలుగా వస్తున్న అలవాటు. బరువు తగ్గడానికి ఇది ఒక సులభమైన మార్గమని, దీనివల్ల ఎన్నో ఆరోగ్య ప్రయోజనాలు ఉన్నాయని సోషల్ మీడియాలో విస్తృతంగా ప్రచారం జరుగుతోంది. అయితే, ఈ పద్ధతి బరువు తగ్గడానికి ఎంతవరకు సహాయపడుతుంది? దీనిపై శాస్త్రీయ ఆధారాలు ఏం చెబుతున్నాయి? అనే విషయాలను పరిశీలిస్తే ఆసక్తికరమైన విషయాలు వెల్లడవుతున్నాయి.

సంప్రదాయ ఆరోగ్య పద్ధతుల్లో భాగంగా వస్తున్న ఈ అలవాటు, ఫ్యాట్‌ను కరిగిస్తుందని, జీవక్రియ (metabolism)ను వేగవంతం చేస్తుందని, శరీరాన్ని డిటాక్స్ చేస్తుందని చాలామంది నమ్ముతారు. కానీ, పోషకాహార నిపుణులు, శాస్త్రీయ అధ్యయనాలు ఈ ప్రచారంలో పూర్తి నిజం లేదని స్పష్టం చేస్తున్నాయి. ఇది బరువు తగ్గించే ప్రక్రియకు కొంతవరకు సహాయపడగలదే తప్ప, పూర్తిస్థాయి పరిష్కారం కాదని స్ప‌ష్టం చేస్తున్నారు.

పరిశోధనలు, అధ్యయనాలు ఏం చెబుతున్నాయి?
నియంత్రిత ట్రయల్స్‌పై జరిపిన పలు విశ్లేషణల ప్రకారం.. తేనె వినియోగం వల్ల కొన్ని ఆరోగ్య ప్రయోజనాలు ఉన్నట్లు తేలింది. ముఖ్యంగా 2022లో జరిపిన ఒక మెటా-ఎనాలిసిస్ ప్రకారం, రిఫైన్డ్ షుగర్ (శుద్ధి చేసిన చక్కెర)తో పోలిస్తే, స్వచ్ఛమైన తేనె వాడటం వల్ల రక్తంలో చక్కెర స్థాయిలు, కొలెస్ట్రాల్‌ను నియంత్రించడంలో స్వల్ప మెరుగుదల కనిపించింది. తేనెలో ఉండే పాలీఫెనాల్స్, యాంటీఆక్సిడెంట్లు దీనికి కారణమని భావిస్తున్నారు. జంతువులపై జరిపిన కొన్ని అధ్యయనాల్లో అధిక కొవ్వు ఉన్న ఆహారం తీసుకున్నప్పటికీ, తేనె వల్ల బరువు పెరుగుదల నియంత్రణలో ఉన్నట్లు గమనించారు.

అయితే, మనుషులపై జరిపిన అధ్యయనాలు చాలా పరిమితం. వాటి ఫలితాలు కూడా మిశ్రమంగా ఉన్నాయి. కొన్ని చిన్నపాటి అధ్యయనాల్లో స్వల్పంగా బరువు లేదా బీఎంఐ తగ్గినా, చాలా సందర్భాల్లో క్యాలరీలను లెక్కలోకి తీసుకున్నప్పుడు పెద్దగా ప్రభావం చూపలేదని తేలింది. నిమ్మరసం-తేనె నీటితో చేసిన ఒక స్వల్పకాలిక అధ్యయనంలో తాత్కాలికంగా బరువు తగ్గడం కనిపించినా, అది కేవలం క్యాలరీలు తగ్గించడం, శరీరం హైడ్రేట్‌గా ఉండటం వల్లేనని, మిశ్రమం ప్రత్యేకత కాదని నిపుణులు పేర్కొన్నారు.

వాస్తవం ఏమిటి?
ఏ ఒక్క పానీయం కూడా అద్భుతాలు చేసి కొవ్వును కరిగించలేదని పోషకాహార నిపుణులు స్పష్టం చేస్తున్నారు. ఒక టేబుల్ స్పూన్ తేనెలో సుమారు 60-65 క్యాలరీలు ఉంటాయి. దీనిలో ప్రధానంగా ఫ్రక్టోజ్, గ్లూకోజ్ వంటి చక్కెరలే ఉంటాయి. దీనివల్ల కలిగే ప్రధాన ప్రయోజనం ఏమిటంటే, అధిక క్యాలరీలు ఉండే చక్కెర పానీయాలు, టీ, కాఫీల బదులుగా దీన్ని తీసుకోవడం. దీనివల్ల మొత్తం మీద క్యాలరీల వినియోగం తగ్గుతుంది. గోరువెచ్చని నీరు జీర్ణక్రియకు, కడుపు నిండిన అనుభూతికి సహాయపడవచ్చు. అంతేతప్ప, ఈ మిశ్రమానికి ప్రత్యేకంగా కొవ్వును కరిగించే శక్తి లేదని నిపుణులు స్ప‌ష్టం చేస్తున్నారు. వాడే తేనె నాణ్యత కూడా ముఖ్యమే. వేడి చేయని, శుద్ధి చేయని (raw honey) తేనెలో ఎక్కువ ఎంజైమ్‌లు, యాంటీఆక్సిడెంట్లు ఉంటాయి.

చివరగా నిపుణులు చెప్పేదేమిటంటే.. తేనె కలిపిన గోరువెచ్చని నీరు తాగడం అనేది ఒక మంచి అలవాటే. ఇది శరీరాన్ని హైడ్రేట్‌గా ఉంచడానికి, ఇతర అనారోగ్యకర పానీయాలకు దూరంగా ఉండటానికి సహాయపడుతుంది. కానీ, దీన్ని బరువు తగ్గించే మ్యాజిక్ డ్రింక్‌గా భావించకూడదు. సమతుల్య ఆహారం, క్రమం తప్పని వ్యాయామం, సరిపడినంత నిద్ర వంటి ఆరోగ్యకరమైన జీవనశైలికి ఇది ఒక చిన్న తోడ్పాటు మాత్రమే. డయాబెటిస్ ఉన్నవారు తేనె తీసుకునేటప్పుడు జాగ్రత్తగా ఉండాలి. పూర్తిస్థాయి బరువు తగ్గించుకునే ప్రణాళిక కోసం వైద్యులు లేదా పోషకాహార నిపుణులను సంప్రదించడం ఉత్తమం.