యూపీలోని భారత్-నేపాల్ సరిహద్దులో అమెరికా పౌరుడు అరెస్ట్

సరైన ధ్రువీకరణ పత్రాలు లేకుండా భారత్‌కు చేరుకుని, ఇక్కడి నుంచి నేపాల్‌లోకి అక్రమంగా ప్రవేశించేందుకు ప్రయత్నించిన ఓ అమెరికా పౌరుడిని భద్రతా బలగాలు అదుపులోకి తీసుకున్నాయి. ఉత్తరప్రదేశ్‌లోని మహారాజ్‌గంజ్ జిల్లా సోనౌలీ సరిహద్దు వద్ద జులై 11న ఈ ఘటన చోటుచేసుకుంది. కాలిఫోర్నియాకు చెందిన జోర్డాన్ బ్రౌన్ (36) అనే వ్యక్తిని సశస్త్ర సీమా బల్ (SSB) సిబ్బంది అరెస్ట్ చేశారు.

సోనౌలీ పోలీస్ స్టేషన్ పరిధిలోని మైనీహ్వా ప్రాంతంలో, సరిహద్దు పిల్లర్ 516 వద్ద ఎస్ఎస్‌బీ సిబ్బంది గస్తీ నిర్వహిస్తుండగా, జోర్డాన్ బ్రౌన్ అక్రమ మార్గంలో నేపాల్ వైపు వెళుతూ పట్టుబడ్డాడు. అతడిని విచారించగా, అతని వద్ద పాస్‌పోర్ట్, వీసా వంటి ఎటువంటి గుర్తింపు పత్రాలు లేవని తేలింది. విచారణలో భాగంగా, తన పాస్‌పోర్ట్‌ను థాయ్‌లాండ్‌లో పోగొట్టుకున్నానని, 2025 నవంబర్‌లో శ్రీలంక నుంచి సముద్ర మార్గం ద్వారా భారత్‌లోకి ప్రవేశించి, అప్పటి నుంచి గోవాలో నివసిస్తున్నట్లు అతను వెల్లడించాడు.

నిందితుడి వద్ద నుంచి రూ. 31,460 నగదు, మొబైల్ ఫోన్లు, ఇతర వస్తువులను స్వాధీనం చేసుకున్నట్లు మహారాజ్‌గంజ్ అదనపు ఎస్పీ సిద్ధార్థ్ వెల్లడించారు. ఇమ్మిగ్రేషన్, ఫారినర్స్ చట్టంలోని పలు సెక్షన్ల కింద కేసు నమోదు చేసి, నిందితుడిని జ్యుడీషియల్ కస్టడీకి తరలించారు. తాను గతంలో యూఎస్ నేవీ, స్పెషల్ ఫోర్సెస్‌లో పనిచేశానని అతను చెప్పిన వివరాలను అధికారులు ప్రస్తుతం ధ్రువీకరించుకుంటున్నారు. ఈ అరెస్ట్ వ్యవహారంపై ఢిల్లీలోని అమెరికా రాయబార కార్యాలయానికి సమాచారం అందించారు. భారత్-నేపాల్ సరిహద్దుల్లోని సోనౌలీ అత్యంత రద్దీగా ఉండే కీలక మార్గాల్లో ఒకటి కావడం గమనార్హం.