మహిళలు వంట నేర్చుకోవాలన్న యూపీ గవర్నర్.. కంగనా రియాక్షన్ పై విమర్శలు!

బాలీవుడ్ నటి, బీజేపీ ఎంపీ కంగనా రనౌత్ మరోసారి తన వ్యాఖ్యలతో వార్తల్లో నిలిచారు. మహిళలు వంట చేయడం నేర్చుకోవాలంటూ ఉత్తరప్రదేశ్ గవర్నర్ ఆనందీబెన్ పటేల్ చేసిన వ్యాఖ్యలకు ఆమె మద్దతు పలకడం సోషల్ మీడియాలో కొత్త చర్చకు దారితీసింది. పోషణ, ప్రేమను పంచడం స్త్రీల సహజ స్వభావమని కంగనా పేర్కొన్నారు.

ఉద్యోగం చేసే మహిళలు, టీచర్లు, ఐఏఎస్ అధికారులు అయినా సరే.. తమ కుటుంబం కోసం వంట చేయడం నేర్చుకోవాలని ఆనందీబెన్ పటేల్ ఇటీవల ఓ ప్రసంగంలో అన్నారు. మహిళలు ముందుగా "నిపుణులైన తల్లులు"గా మారాలని, అత్తగారింట్లో పరిస్థితులను ఎలా ఎదుర్కోవాలో తమ కుమార్తెలకు శిక్షణ ఇవ్వాలని సూచించారు.

ఈ ప్రసంగానికి సంబంధించిన వీడియోను కంగనా తన ఎక్స్ ఖాతాలో పోస్ట్ చేశారు. దీనికి తన అభిప్రాయాన్ని జోడిస్తూ.. "చిన్నప్పుడు నేను బొమ్మలతో ఆడుకుంటూ వాటికి వంట చేసి పెట్టేదాన్ని. కానీ మా అన్నయ్య స్పోర్ట్స్ ఆడేవాడు. ప్రేమించడం, ఆహారం అందించడం, జాగ్రత్తలు తీసుకోవడం వంటివి దేవుడు స్త్రీలకు ఇచ్చిన నిజమైన స్వభావం. అందుకే వారిని దేవి, శక్తి, అన్నపూర్ణ, మాత అని పిలుస్తాం. ఇది బలవంతంగా నేర్చుకునేది కాదు, ఆనందంగా చేసే కర్తవ్యం" అని వివరించారు.

ఈ పోస్ట్‌తో ఆన్‌లైన్‌లో పెద్ద చర్చ మొదలైంది. కంగనా అభిప్రాయాలు తిరోగమనమైనవని, పితృస్వామ్యాన్ని ప్రోత్సహించేలా ఉన్నాయని కొందరు విమర్శించారు. మరికొందరు సంప్రదాయం, ఆధునిక జీవనశైలి మధ్య సమతుల్యంపై చర్చిస్తున్నారు. సాంప్రదాయ అంశాలపై కంగనా తరచూ చేసే వ్యాఖ్యలు ఇలాంటి చర్చలకు దారితీయడం గమనార్హం.