పీఎఫ్ ఖాతాల్లో వడ్డీ డబ్బులు.. జులై 15 నాటికి అందరి ఖాతాల్లో వడ్డీ జమ

ఉద్యోగుల భవిష్య నిధి సంస్థ (ఈపీఎఫ్ఓ) తన చందాదారులకు తీపి కబురు అందించింది. 2025-26 ఆర్థిక సంవత్సరానికి గానూ 8.25 శాతం వడ్డీని ఖాతాల్లో జమ చేసే ప్రక్రియను ప్రారంభించింది. ఈ ప్రక్రియ ద్వారా దేశవ్యాప్తంగా సుమారు 34 కోట్ల మంది సభ్యుల ఖాతాల్లోకి వడ్డీ సొమ్ము జమ కానుంది. 2026 జులై 15 నాటికి సభ్యులందరి పాస్‌బుక్‌లలో అప్‌డేట్ అయిన బ్యాలెన్స్ కనిపిస్తుందని అధికారులు వెల్లడించారు.

కేంద్ర కార్మిక, ఉపాధి శాఖ మంత్రి మన్సుఖ్ మాండవీయ ఇటీవల ఈ విషయాన్ని ప్రకటించారు. కొత్తగా ప్రవేశపెట్టిన కేంద్రీకృత ఐటీ ఆధారిత సేవల (సీఐటీఈఎస్) వ్యవస్థ ద్వారా రూ.1.44 లక్షల కోట్లకు పైగా వడ్డీని ఆటోమేటిక్‌గా ప్రాసెస్ చేస్తున్నట్లు ఆయన వెల్లడించారు. గతంలో వడ్డీ జమ ప్రక్రియ అక్టోబర్ లేదా నవంబర్ వరకు ఆలస్యమయ్యేదని, అయితే సరికొత్త సాంకేతికతతో ఈసారి ప్రక్రియ అత్యంత వేగంగా పూర్తవుతోందని ఆయన పేర్కొన్నారు.

జులై 11 నాటికే సుమారు 80 శాతం ఖాతాల్లో వడ్డీ జమ అయినట్లు నివేదికలు స్పష్టం చేస్తున్నాయి. మిగిలిన ఖాతాలకు కూడా జులై మధ్య నాటికి ప్రక్రియ పూర్తిచేయాలని అధికారులు లక్ష్యంగా పెట్టుకున్నారు. ఒకవేళ తమ ఖాతాలో వడ్డీ వెంటనే కనిపించకపోయినా సభ్యులు ఆందోళన చెందాల్సిన అవసరం లేదని, సిస్టమ్ అప్‌డేట్ అవుతున్నందున కొద్ది రోజుల్లో బ్యాలెన్స్ కనిపిస్తుందని అధికారులు సూచించారు.

బ్యాలెన్స్ ఎలా చెక్ చేసుకోవాలి?

వడ్డీ జమ అయ్యాక సభ్యులు తమ పీఎఫ్ బ్యాలెన్స్‌ను పలు మార్గాల్లో తనిఖీ చేసుకోవచ్చు:
ఈపీఎఫ్ఓ పోర్టల్: యూఏఎన్ నంబర్, పాస్‌వర్డ్‌తో లాగిన్ అయి 'వ్యూ పాస్‌బుక్' ఆప్షన్ ద్వారా బ్యాలెన్స్ చూడవచ్చు.
ఉమంగ్ యాప్: ఈ యాప్‌లో యూఏఎన్ లింక్ చేసుకుని పీఎఫ్ బ్యాలెన్స్ వివరాలు పొందవచ్చు.
ఎస్సెమ్మెస్ సర్వీస్: రిజిస్టర్డ్ మొబైల్ నంబర్ నుంచి "EPFOHO UAN" అని టైప్ చేసి 7738299899 నంబర్‌కు ఎస్సెమ్మెస్ పంపడం ద్వారా బ్యాలెన్స్ తెలుసుకోవచ్చు.