టీజీపీఎస్సీ నుంచి మరో జాబ్ నోటిఫికేషన్.. దరఖాస్తులు ఎప్పటినుంచంటే..!

తెలంగాణలో ప్రభుత్వ ఉద్యోగాల భర్తీ ప్రక్రియను రాష్ట్ర ప్రభుత్వం వేగవంతం చేసింది. ఇందులో భాగంగా, తెలంగాణ పబ్లిక్ సర్వీస్ కమిషన్ (టీజీపీఎస్సీ) తాజాగా మరో ఉద్యోగ ప్రకటనను విడుదల చేసింది. రాష్ట్ర పట్టణ ప్రణాళిక విభాగంలో ఖాళీగా ఉన్న 7 టౌన్‌ప్లానింగ్ సహాయకుల (టౌన్‌ప్లానింగ్ అసిస్టెంట్) పోస్టుల భర్తీకి ఈ నోటిఫికేషన్ జారీ చేసింది.

ఈ పోస్టులకు అర్హులైన అభ్యర్థులు ఈ నెల 15వ తేదీ నుంచి ఆన్‌లైన్ ద్వారా దరఖాస్తు చేసుకోవచ్చని కమిషన్ సూచించింది. దరఖాస్తుల సమర్పణకు ఆగస్టు 22వ తేదీని తుది గడువుగా నిర్ణయించారు. మొత్తం 7 పోస్టులలో 2 రాష్ట్రస్థాయి కేడర్‌కు చెందినవి కాగా, మిగిలిన 5 పోస్టులు మల్టీజోనల్ కేడర్ పరిధిలోకి వస్తాయని టీజీపీఎస్సీ వివరించింది.

ఈ పోస్టులకు దరఖాస్తు చేసుకునే అభ్యర్థులు గుర్తింపు పొందిన విశ్వవిద్యాలయం నుంచి బీ.ప్లానింగ్ లేదా బీటెక్ (ప్లానింగ్)లో ఉత్తీర్ణులై ఉండాలి. ఎంపిక ప్రక్రియలో భాగంగా ఈ ఏడాది అక్టోబరులో రాతపరీక్ష నిర్వహించనున్నట్లు కమిషన్ తన ప్రకటనలో స్పష్టం చేసింది. నియామకాలకు సంబంధించిన పూర్తి వివరాలు అధికారిక నోటిఫికేషన్‌లో అందుబాటులో ఉంటాయి.