అమెరికాకు ఒక న్యాయం.. మాకు ఒక న్యాయమా?: ఫిఫా నిర్ణయంపై ఫ్రాన్స్ అసంతృప్తి!

ఫిఫా ప్రపంచకప్ 2026 క్వార్టర్ ఫైనల్స్‌లో మొరాకోతో కీలక పోరుకు సిద్ధమవుతున్న ఫ్రాన్స్ జట్టుకు గట్టి ఎదురుదెబ్బ తగిలింది. పరాగ్వేతో జరిగిన రౌండ్ ఆఫ్ 16 మ్యాచ్‌లో ఫ్రాన్స్ వింగర్, బేయర్న్ మ్యూనిచ్ స్టార్ మైఖేల్ ఒలీస్‌కు రిఫరీ చూపించిన ఎల్లో కార్డ్‌ను రద్దు చేయాలంటూ ఫ్రాన్స్ ఫుట్‌బాల్ ఫెడరేషన్ (ఎఫ్ఎఫ్ఎఫ్) చేసిన అప్పీల్‌ను ప్రపంచ ఫుట్‌బాల్ నియంత్రణ సంస్థ (ఫిఫా) అధికారికంగా తిరస్కరించింది. ఈ విషయాన్ని ఫ్రాన్స్ హెడ్ కోచ్ డిడియర్ డెషాంప్స్ విలేకరుల సమావేశంలో ధ్రువీకరించారు. "ఒలీస్ ఎల్లో కార్డ్ విషయంలో ఎలాంటి మార్పూ లేదు.. ఆ నిర్ణయాన్ని అలాగే కొనసాగిస్తున్నట్లు ఫిఫా నుండి మాకు అధికారిక సమాచారం అందింది" అని ఆయన పేర్కొన్నారు.

పరాగ్వేతో జరిగిన హోరాహోరీ మ్యాచ్‌లో 97వ నిమిషంలో పరాగ్వే మిడ్‌ఫీల్డర్ మథియాస్ గలార్జాతో జరిగిన స్వల్ప ఘర్షణ కారణంగా ఒలీస్‌కు ఈ ఎల్లో కార్డ్ లభించింది. వీడియో రిప్లేలలో ఒలీస్ కేవలం ప్రత్యర్థి ఆటగాడి జెర్సీని మాత్రమే పట్టుకోగా, గలార్జా మాత్రం ముఖంపై దెబ్బ తగిలినట్లు కిందపడిపోవడం స్పష్టంగా కనిపించింది. ఈ స్పష్టమైన వీడియో ఆధారాలను చూపిస్తూ ఫ్రాన్స్ అప్పీల్ చేసినప్పటికీ, ఆన్-ఫీల్డ్ అంపైర్ నిర్ణయాన్నే కొనసాగించాలని ఫిఫా డిసిప్లినరీ ప్యానెల్ నిర్ణయించింది.

అయితే, ఈ టోర్నమెంట్‌లో అమెరికా ఆటగాడి విషయంలో ఫిఫా వ్యవహరించిన తీరును ఫ్రాన్స్ అధికారులు ఎత్తిచూపుతున్నారు. బోస్నియా అండ్ హెర్జెగోవినాతో జరిగిన మ్యాచ్‌లో అమెరికా స్ట్రైకర్ ఫోలారిన్ బలోగన్‌కు డైరెక్ట్ రెడ్ కార్డ్ ఇవ్వడంతో ఒక మ్యాచ్ నిషేధం పడింది. కానీ, అమెరికా అధ్యక్షుడు డొనాల్డ్ ట్రంప్ స్వయంగా ఫిఫా అధ్యక్షుడు జియాని ఇన్ఫాంటినోకు ఫోన్ చేసి రాజకీయ ఒత్తిడి తీసుకురావడంతో.. ఫిఫా ఆ నిషేధాన్ని ఎత్తివేసి, బెల్జియంతో జరిగిన రౌండ్ ఆఫ్ 16 మ్యాచ్‌లో బలోగన్ ఆడేందుకు అనుమతించింది. ఫిఫా తీసుకున్న ఈ వివాదాస్పద నిర్ణయంపై యూఈఎఫ్ఏ, బెల్జియం ఫుట్‌బాల్ అసోసియేషన్ తీవ్ర ఆగ్రహం వ్యక్తం చేశాయి. అమెరికా విషయంలో అంతలా లొంగిపోయిన ఫిఫా.. తమ అప్పీల్ విషయంలో మాత్రం కఠినంగా వ్యవహరించిందని ఫ్రాన్స్ వర్గాలు భావిస్తున్నాయి.

ఈ నిర్ణయంతో ఫ్రాన్స్ జట్టుకు క్రీడా పరంగా గడ్డు పరిస్థితి ఎదురైంది. మొరాకోతో జరగబోయే క్వార్టర్ ఫైనల్ మ్యాచ్‌లో మైఖేల్ ఒలీస్‌కు గనుక మరో ఎల్లో కార్డ్ వస్తే, నిబంధనల ప్రకారం తదుపరి సెమీఫైనల్ మ్యాచ్‌ (స్పెయిన్ లేదా బెల్జియంతో జరిగే మ్యాచ్)కు అతడు దూరమవుతాడు.