ఝార్ఖండ్‌ హాస్టల్‌లో ఘోరం.. పాముకాటుకు విద్యార్థిని బలి

ఝార్ఖండ్‌లో తీవ్ర విషాదకర ఘటన చోటుచేసుకుంది. ఓ ప్రైవేట్ రెసిడెన్షియల్ పాఠశాల బాలికల వసతి గృహంలోకి ప్రవేశించిన అత్యంత విషపూరితమైన కట్లపాము, నిద్రిస్తున్న విద్యార్థినులను కాటువేసింది. ఈ ఘటనలో 12 ఏళ్ల బాలిక ప్రాణాలు కోల్పోగా, మరో ముగ్గురు విద్యార్థినులు ప్రస్తుతం ఆసుపత్రిలో చికిత్స పొందుతున్నారు. వారిలో ఒకరి పరిస్థితి విషమంగా ఉన్నట్లు సమాచారం.

లోహర్‌దగా జిల్లా పరిధిలోని సన్‌వాసిరా హయ్యర్ సెకండరీ రెసిడెన్షియల్ పాఠశాలలో ఈ దురదృష్టకర సంఘటన జరిగింది. వసతి గృహంలోని ఒక గదిలో ఏడుగురు బాలికలు నిద్రిస్తుండగా, లోపలికి ప్రవేశించిన కట్లపాము తొలుత ఒక బాలికను కాటువేసింది. ఆమె కేకలు వేయడంతో తోటి విద్యార్థినులు మేల్కొన్నప్పటికీ, అప్రమత్తమయ్యే లోపే పాము మరో ముగ్గురిని కాటువేసింది.

ఈ ఘటనలో 12 ఏళ్ల విద్యార్థిని ఆసుపత్రికి తరలించే లోపే మృతి చెందినట్లు వైద్యులు ధృవీకరించారు. బాధితులలో ఇద్దరు లోహర్‌దగా సదర్ ఆసుపత్రిలో చికిత్స పొందుతుండగా, పరిస్థితి విషమంగా ఉన్న మరో విద్యార్థినిని మెరుగైన వైద్యం కోసం రాంచిలోని రిమ్స్ ఆసుపత్రికి తరలించారు. ఈ విషయం తెలిసిన వెంటనే బాధితుల తల్లిదండ్రులు ఆసుపత్రికి చేరుకుని, వసతి గృహంలో కనీస భద్రతా ప్రమాణాలు పాటించకపోవడం వల్లే ఈ ప్రమాదం జరిగిందని పాఠశాల యాజమాన్యంపై తీవ్ర ఆగ్రహం వ్యక్తం చేశారు. ఈ ఘటనపై స్థానిక పోలీసులు కేసు నమోదు చేసి దర్యాప్తు ప్రారంభించారు.