ధోనీకి తమిళనాడు సీఎం విజయ్ బర్త్ డే విషెస్.. వైరల్ అయిన పాత ఫోటో!

భారత క్రికెట్ దిగ్గజం మహేంద్ర సింగ్ ధోనీకి తమిళనాడు ముఖ్యమంత్రి విజయ్ హృదయపూర్వక జన్మదిన శుభాకాంక్షలు తెలిపారు. నిన్న ధోనీ పుట్టినరోజును పురస్కరించుకుని, 2021లో తామిద్దరూ కలిసి దిగిన ఒక పాత జ్ఞాపకాన్ని పంచుకుంటూ విజయ్ చేసిన ఎమోషనల్ పోస్ట్ ప్రస్తుతం సోషల్ మీడియాలో వైరల్‌గా మారింది.

విజయ్ తన సందేశంలో ధోనీపై ఉన్న అభిమానాన్ని అద్భుతంగా ఆవిష్కరించారు. "మీ పేరు ప్రతిధ్వనించే ప్రతి విజిల్‌లోనూ, మీరు స్ఫూర్తినిచ్చిన కోట్లాది హృదయాల్లోనూ మీ ప్రయాణం తమిళనాడు క్రీడా చరిత్రలో ఒక మధుర జ్ఞాపకంగా నిలిచిపోయింది. మా 'కెప్టెన్ కూల్' మహేంద్ర సింగ్ ధోనీకి హృదయపూర్వక పుట్టినరోజు శుభాకాంక్షలు! మీ అసాధారణ క్రికెట్ వారసత్వం, ప్రశాంతమైన నాయకత్వం మరియు వినయపూర్వకమైన స్వభావం తరతరాలకు స్ఫూర్తినిస్తూనే ఉంటాయి. మీకు సంపూర్ణ ఆరోగ్యం, సంతోషం కలగాలని మనస్ఫూర్తిగా కోరుకుంటున్నాను" అని విజయ్ పేర్కొన్నారు.

ఈ పోస్ట్‌కు అభిమానుల నుంచి విశేష స్పందన లభిస్తోంది. "భారతీయ సినీ దిగ్గజం, క్రికెట్ లెజెండ్‌‌కు శుభాకాంక్షలు తెలపడం ఆనందంగా ఉంది" అని ఒకరు, "మా ఇద్దరు ఐడల్స్ ఒకే ఫ్రేమ్‌లో" అని మరొకరు కామెంట్ చేశారు. "కెప్టెన్ కూల్ వర్సెస్ కూలెస్ట్ సీఎం" వంటి కామెంట్లతో అభిమానులు తమ సంతోషాన్ని వ్యక్తపరుస్తున్నారు.

ప్రస్తుతం నెట్టింట ట్రెండింగ్‌లో ఉన్న ఈ ఫోటోను 2021 ఆగస్టులో చెన్నైలోని గోకులం స్టూడియోస్‌లో తీశారు. విజయ్ తన 'బీస్ట్' చిత్ర షూటింగ్‌లో ఉండగా, ధోనీ ఒక వాణిజ్య ప్రకటన చిత్రీకరణ కోసం అక్కడికి వచ్చారు. ఈ సందర్భంగా విజయ్ క్యారవాన్‌లో వారిద్దరూ మర్యాదపూర్వకంగా కలుసుకున్నారు. కాగా, నిన్న ధోనీ పుట్టినరోజు సందర్భంగా అభిమానులు, ప్రముఖుల నుంచి శుభాకాంక్షలు వెల్లువెత్తాయి.