ఆఫ్ఘన్ క్రికెట్‌లో విషాదం.. భారత్‌లో చికిత్స పొందుతూ మాజీ పేసర్ షాపూర్ జద్రాన్ మృతి

ఆఫ్ఘనిస్థాన్ క్రికెట్‌లో తీవ్ర విషాదం నెలకొంది. ఆ దేశ మాజీ ఫాస్ట్ బౌలర్ షాపూర్ జద్రాన్ (38) కన్నుమూశాడు. గత కొంతకాలంగా తీవ్ర అనారోగ్యంతో బాధపడుతున్న జద్రాన్, ఢిల్లీలో చికిత్స పొందుతూ నేడు తుదిశ్వాస విడిచాడు. రేపు తన 39వ పుట్టినరోజు జరుపుకోవాల్సి ఉండగా, ఒక్కరోజు ముందే అతడు ఈ లోకాన్ని వీడటం ఆఫ్ఘన్ క్రికెట్ సమాజాన్ని శోకసంద్రంలో ముంచింది. ఈ విషయాన్ని ఆఫ్ఘనిస్థాన్ క్రికెట్ బోర్డు (ఏసీబీ) అధికారికంగా ధ్రువీకరించింది.

షాపూర్ జద్రాన్, స్టేజ్ ఫోర్ హెమోఫాగోసిటిక్ లింఫోహిస్టియోసైటోసిస్ (హెచ్‌ఎల్‌హెచ్) అనే అరుదైన, ప్రాణాంతక వ్యాధితో బాధపడుతున్నాడు. ఈ వ్యాధి శరీరంలో తీవ్రమైన ఇన్‌ఫ్లమేషన్‌కు కారణమవుతుంది, దీనివల్ల ఎముకల మజ్జ, కాలేయం, ప్లీహం వంటి కీలక అవయవాలు దెబ్బతింటాయి. గతేడాది అక్టోబర్‌లో అత‌ని ఆరోగ్యం క్షీణించడంతో మెరుగైన చికిత్స కోసం భారత్‌కు వెళ్లాలని వైద్యులు సూచించారు. దీంతో ఆఫ్ఘన్ స్టార్ క్రికెటర్ రషీద్ ఖాన్, ఏసీబీ ఛైర్మన్ మీర్వైస్ అష్రఫ్ ప్రత్యేక చొరవ తీసుకుని అత‌ని వీసా ప్రక్రియను వేగవంతం చేశారు. ఈ ఏడాది జనవరి 18న జద్రాన్ న్యూఢిల్లీలోని ఓ ఆసుపత్రిలో చేరాడు. అప్పటి నుంచి అత‌నికి చికిత్స కొనసాగుతోంది. మే నెల నుంచి ఐసీయూలోనే ఉన్నాడు.

జద్రాన్ చికిత్స సమయంలో ఆఫ్ఘన్ క్రికెట్ సమాజం జద్రాన్ కు అండగా నిలిచింది. మాజీ కెప్టెన్ అస్గర్ అఫ్ఘన్, దుబాయ్ నుంచి ఢిల్లీకి పలుమార్లు ప్రయాణించి జద్రాన్‌కు ధైర్యం చెప్పాడు. రషీద్ ఖాన్‌తో పాటు పలువురు ఆఫ్ఘన్ క్రికెటర్లు ఎప్పటికప్పుడు అత‌ని కుటుంబ సభ్యులు, వైద్యులతో మాట్లాడుతూ ఆరోగ్య పరిస్థితిని తెలుసుకున్నారు. చికిత్స ప్రారంభంలో అత‌ని ఆరోగ్యం కాస్త మెరుగుపడినప్పటికీ, తరచూ ఇన్‌ఫెక్షన్లు సోకడం, డెంగ్యూ, రక్తంలో ఎర్ర రక్త కణాల సంఖ్య గణనీయంగా పడిపోవడంతో పరిస్థితి మళ్లీ విషమించి, చివరికి మరణానికి దారితీసింది.

ఏసీబీ తీవ్ర దిగ్భ్రాంతి  
షాపూర్ జద్రాన్ మృతిపై ఆఫ్ఘనిస్థాన్ క్రికెట్ బోర్డు తీవ్ర దిగ్భ్రాంతి వ్యక్తం చేసింది. "ఆఫ్ఘన్ క్రికెట్‌కు షాపూర్ గౌరవం, ధైర్యంతో గర్వించేలా సేవలందించాడు. అతను అందించిన సేవలు, సాధించిన విజయాలు ఆఫ్ఘన్ క్రికెట్ చరిత్రలో ఎప్పటికీ నిలిచిపోతాయి. మైదానం బయట కూడా షాపూర్ ఎంతో మంది యువ క్రికెటర్లకు స్ఫూర్తిగా నిలిచాడు. అతడి పోరాట స్ఫూర్తి, పట్టుదల, ఆటపై ఉన్న ప్రేమ ఎందరికో ఆశను ఇచ్చాయి. ఆఫ్ఘన్ క్రికెట్ భవిష్యత్తుపై నమ్మకం కలిగించి, పెద్ద కలలు కనేలా ఒక తరాన్ని ప్రోత్సహించాయి" అని ఏసీబీ తమ ప్రకటనలో పేర్కొంది. అత‌ని కుటుంబ సభ్యులకు, స్నేహితులకు, మాజీ సహచరులకు, యావత్ ఆఫ్ఘన్ క్రికెట్ సమాజానికి ఏసీబీ తమ ప్రగాఢ సానుభూతిని తెలియజేసింది. జద్రాన్ 2009 నుంచి 2020 మధ్య ఆఫ్ఘనిస్థాన్ తరఫున 44 వన్డేలు, 36 టీ20 మ్యాచ్‌లు ఆడాడు.