'రెడ్ కార్డ్ అంటే నాకేం తెలుసు?': ఫిఫా వివాదంపై నోరు విప్పిన డొనాల్డ్ ట్రంప్!

ఫిఫా ప్రపంచకప్‌లో అమెరికా ఆటగాడికి ఇచ్చిన రెడ్ కార్డ్ వ్యవహారంలో తాను జోక్యం చేసుకోవడాన్ని అమెరికా అధ్యక్షుడు డొనాల్డ్ ట్రంప్ సోమవారం సమర్థించుకున్నారు. ఆ రెడ్ కార్డ్ నిర్ణయం ఎంతమాత్రం సమర్థనీయం కాదని, టోర్నమెంట్‌లో అత్యుత్తమ ఆటగాళ్లు మైదానంలో ఉండాలనే ఉద్దేశంతోనే తాను కేవలం పునఃసమీక్ష (రివ్యూ) మాత్రమే కోరానని స్పష్టం చేశారు. వైట్‌హౌస్‌లో పిల్లల కోసం 'ట్రంప్ అకౌంట్స్' పథకాన్ని ప్రారంభించిన అనంతరం ఆయన మీడియాతో మాట్లాడారు. ఈ ఘటన తర్వాత తాను ఫిఫా అధ్యక్షుడు జియాని ఇన్ఫాంటినోతో మాట్లాడినట్లు ధ్రువీకరించిన ట్రంప్.. ఆ ఆటగాడిపై నిషేధాన్ని రద్దు చేస్తూ ఫిఫా చివరకు సరైన నిర్ణయమే తీసుకుందని అన్నారు.

"నేను కేవలం రివ్యూ మాత్రమే అడిగాను, ఎందుకంటే అది అసలు ఫౌలే కాదని నేను భావించాను. ఇద్దరు గొప్ప అథ్లెట్లు ఒకరినొకరు ఢీకొట్టుకుని కిందపడ్డారంతే. అంతేగానీ ఒకరి ముఖంపై మరొకరు గుద్దినంత దారుణమేమీ అక్కడ జరగలేదు" అని ట్రంప్ వ్యాఖ్యానించారు. అయితే, ఈ నిర్ణయాన్ని మార్చాలని తాను ఫిఫాపై ఎలాంటి ఒత్తిడి తీసుకురాలేదని స్పష్టం చేశారు. "ఈ నిర్ణయంతో నాకు ఎలాంటి సంబంధం లేదు. నేను చేసిందిల్లా రివ్యూ చేయమని అడగటమే" అని పేర్కొన్నారు. ఒక రెడ్ కార్డ్ వల్ల సదరు ఆటగాడు తదుపరి మ్యాచ్‌కు కూడా దూరమవుతాడనే విషయం తెలిసి తాను ఆశ్చర్యపోయానని ట్రంప్ చెప్పారు. "అసలు ఆ రెడ్ కార్డ్ అంటే ఏంటో నాకేం తెలియదు. ఆ రూల్ గురించి తెలిశాక.. జోక్ చేస్తున్నారా? మన బెస్ట్ ప్లేయర్ తర్వాతి మ్యాచ్ ఆడడా? అని అడిగాను" అని ట్రంప్ వివరించారు.

జట్టులోని ప్రధాన ఆటగాడిని పక్కన పెడితే టోర్నమెంట్ స్ఫూర్తి దెబ్బతింటుందని ఆయన వాదించారు. "మన బెస్ట్ ప్లేయర్స్ మైదానంలో ఉండాలి. ప్రత్యర్థి జట్టు మనల్ని ఓడిస్తే, అప్పుడు వారు నిజంగా గర్వపడొచ్చు. లేదంటే అది చాలా దారుణంగా ఉంటుంది" అన్నారు. ఇదే సమయంలో ఫిఫా ప్రెసిడెంట్ ఇన్ఫాంటినోను తెలివైన, బలమైన నాయకుడిగా ట్రంప్ అభివర్ణించారు. చరిత్రలోనే అత్యంత విజయవంతమైన వరల్డ్‌కప్‌ను ఆయన నడిపిస్తున్నారని, అమెరికాలో జరుగుతున్న ఈ టోర్నీలో ప్రతి మ్యాచ్ ఒక సూపర్‌బౌల్‌లా సాగుతోందని కొనియాడారు. ఇటీవల జరిగిన మెక్సికో-ఇంగ్లాండ్ మ్యాచ్‌ను తాను చూశానని, టీవీ రేటింగులు కూడా భారీగా వస్తున్నాయని చెప్పారు. అమెరికాలో ఫుట్‌బాల్‌కు ఆదరణ వేగంగా పెరుగుతోందన్నారు.

అయితే, రెడ్ కార్డ్ ఇచ్చిన రెఫరీ నిర్ణయాన్ని ట్రంప్ తీవ్రంగా తప్పుపట్టారు. "రెఫరీ నిర్ణయం చాలా దారుణం. అది అస్సలు ఫౌల్ కాదు. మ్యాచ్‌లో అంతకంటే కఠినమైన ఢీకొట్టుకోవడాలు జరిగినా ఎలాంటి శిక్ష పడలేదు" అని దుయ్యబట్టారు. క్రీడాపరమైన నిర్ణయాలను రాజకీయ నాయకులు ప్రభావితం చేసేందుకు ఇదొక సంప్రదాయంగా మారుతుందా? అని ప్రశ్నించగా.. తాను మ్యాచ్ చూసిన తర్వాత కేవలం తన అభిప్రాయాన్ని మాత్రమే వ్యక్తం చేశానని ట్రంప్ స్పష్టం చేశారు. "నేను ఇన్ఫాంటినోకు ఏం చేయాలో చెప్పలేదు. కేవలం దీనిని ఒకసారి రివ్యూ చేయాలని మాత్రమే కోరాను" అని తేల్చి చెప్పారు. అమెరికా జట్టు తన పూర్తి బలంతో తదుపరి మ్యాచ్ బరిలోకి దిగడం కోసం తాను ఎదురుచూస్తున్నానని, గెలుపోటములు ఏవైనా సమాన పద్ధతిలో జరగాలని ట్రంప్ ముగించారు.