E20 కార్యక్రమం ఓ ప్రయోగం కాదు.. తప్పుడు కథనాలను నమ్మొద్దు: కేంద్రం

పెట్రోల్‌లో 20 శాతం ఇథనాల్‌ను కలిపే కార్యక్రమం (E20) ఒక 'కొనసాగుతున్న ప్రయోగం' అని కేంద్ర ప్రభుత్వం సుప్రీంకోర్టులో చెప్పిందంటూ వచ్చిన మీడియా కథనాలను భారత అటార్నీ జనరల్ (ఏజీ) కార్యాలయం తీవ్రంగా ఖండించింది. ఈ వార్తలు పూర్తిగా అవాస్తవమని, నిరాధారమైనవని స్పష్టం చేసింది. సుప్రీంకోర్టులో జరిగిన వాదనలను తప్పుగా అన్వయించి ప్రచురించారని పేర్కొంది.

ఈ మేరకు అటార్నీ జనరల్ ఆర్. వెంకటరమణి కార్యాలయం ఒక ప్రకటన విడుదల చేసింది. భారత్ పెట్రోలియం కార్పొరేషన్ లిమిటెడ్ (బీపీసీఎల్‌) దాఖలు చేసిన స్పెషల్ లీవ్ పిటిషన్‌పై విచారణ సందర్భంగా కేంద్రం తరఫున అత్యున్నత న్యాయాధికారి అయిన ఏజీ వాదనలు వినిపించారు. అయితే, నిన్న‌ కొన్ని మీడియా సంస్థలు ప్రచురించిన కథనాల్లో 'ప్రభుత్వం చేపట్టిన E20 కార్యక్రమం ఇంకా ప్రయోగ దశలోనే ఉందని, దాని ప్రభావం వచ్చే ఏడాదికి స్పష్టమవుతుందని' ఏజీ చెప్పినట్లు తప్పుగా పేర్కొన్నాయని కార్యాలయం తెలిపింది. "ఈ కథనాలు పూర్తిగా అవాస్తవం. కోర్టులో మేము సమర్పించిన వాదనలకు ఏమాత్రం సంబంధం లేనివి" అని ప్రకటనలో స్పష్టం చేసింది. ఇథనాల్ బ్లెండింగ్ ప్రోగ్రామ్ (ఈబీపీ) లేదా E20 కార్యక్రమాన్ని ప్రభుత్వం 'ప్రయోగం' అని అభివర్ణించినట్లు వస్తున్న వార్తలు పూర్తిగా అవాస్తవమని స్ప‌ష్టం చేసింది.

కోర్టులో జరిగిన వాస్తవ వాదనలను ఏజీ కార్యాలయం వివరించింది. ఇథనాల్ కేటాయింపులకు సంబంధించి ఇలాంటి కేసులే దేశంలోని పలు హైకోర్టుల్లో పెండింగ్‌లో ఉన్నాయని ఏజీ వెంకటరమణి సుప్రీంకోర్టు దృష్టికి తీసుకెళ్లారు. ఒకే కాంట్రాక్టు ఫ్రేమ్‌వర్క్‌కు సంబంధించిన ఈ కేసులన్నింటిలోనూ ఉమ్మడి న్యాయపరమైన ప్రశ్నలు ఇమిడి ఉన్నాయని, అందువల్ల వీటన్నింటినీ సుప్రీంకోర్టుకు బదిలీ చేసేలా ట్రాన్స్‌ఫర్ పిటిషన్లు దాఖలు చేస్తున్నామని ఆయన తెలిపారు. దీనివల్ల వేర్వేరు కోర్టుల్లో సమాంతర విచారణలను, పరస్పర విరుద్ధమైన తీర్పుల అవకాశాన్ని నివారించవచ్చని ఆయన వాదించారు. ఈ చర్య ద్వారా, దేశవ్యాప్తంగా పెట్రోల్‌లో 20 శాతం ఇథనాల్ కలపాలన్న జాతీయ కార్యక్రమానికి ఎలాంటి ఆటంకాలు లేకుండా సరఫరా కొనసాగించవచ్చని ఏజీ వివరించారు.

ఈ వాదనలను పరిగణనలోకి తీసుకున్న సుప్రీంకోర్టు, ట్రాన్స్‌ఫర్ పిటిషన్లను దాఖలు చేయడానికి అనుమతించింది. కర్ణాటకకు చెందిన వీఐఎన్‌పీ డిస్టిలరీస్ అండ్ షుగర్స్ ప్రైవేట్ లిమిటెడ్‌కు ఇథనాల్ కేటాయింపులను పునఃపరిశీలించాలని ఆ రాష్ట్ర హైకోర్టు ఇచ్చిన తీర్పును సవాలు చేస్తూ బీపీసీఎల్ వేసిన పిటిషన్‌పై విచారణ జరిపింది. ప్రస్తుత ఇథనాల్ సరఫరా సంవత్సరం (2025–26)లో కేటాయింపులకు సంబంధించి యథాతథ స్థితిని (స్టేటస్ కో) కొనసాగించాలని ఆదేశించింది.

ముఖ్యంగా జాతీయ ప్రాముఖ్యత ఉన్న విధానపరమైన అంశాలకు సంబంధించిన న్యాయస్థాన కార్యకలాపాలపై రిపోర్టింగ్ చేసేటప్పుడు మీడియా సంస్థలు తగిన కచ్చితత్వం పాటించాలని ఏజీ కార్యాలయం విజ్ఞప్తి చేసింది.