మలయాళం నుంచి మరో హారర్ మూవీ .. ఓటీటీలో!

మలయాళం ఇండస్ట్రీ నుంచి వచ్చే ఇన్వెస్టిగేటివ్ థ్రిల్లర్ సినిమాలను .. హారర్ థ్రిల్లర్ సినిమాలను చూడటానికి ఓటీటీ ప్రేక్షకులు ఎక్కువగా ఆసక్తిని చూపుతుంటారు. ఈ తరహా సినిమాలు తెలుగు ఆడియాను కలుపుకుని వస్తే, తెలుగు ఆడియన్స్ కూడా విపరీతంగా చూస్తారు. అలాంటి ఒక సినిమా ఇప్పుడు ఓటీటీ తెరపైకి రావడానికి సిద్ధమవుతోంది. ఆ సినిమా పేరే 'కరక్కం'. మే 28వ తేదీన అక్కడి థియేటర్లకు వచ్చిన సినిమా ఇది.

అంకుశ్ సింగ్ నిర్మించిన ఈ సినిమాకి, సుభాశ్ లలిత - సుబ్రహ్మణ్యం దర్శకత్వం వహించారు. 'మంజుమేల్ బాయ్స్' సినిమాలో లోయలో పడిపోయిన పాత్రను పోషించిన శ్రీనాథ్ భాసి ఈ సినిమాలో ప్రధానమైన పాత్రలో కనిపిస్తాడు. ఫెమీనా జార్జ్ .. సిద్ధార్థ్ భరత్ ఇతర ముఖ్యమైన పాత్రలలో కనిపించనున్నారు. ఈ నెల 3వ తేదీ (శుక్రవారం) నుంచి ఈ సినిమా 'సోనీ లివ్'లో స్ట్రీమింగ్ కానుంది. సామ్ సీఎస్ సంగీతాన్ని సమకూర్చిన ఈ సినిమా, మలయాళంతో పాటు తెలుగులోను అందుబాటులోకి రానుంది. 

కొత్త ఏడాది వేడుకలలో హీరో .. అతని ఫ్రెండ్స్ పీకలదాకా తాగేస్తారు. తాము ఏం చేస్తున్నామనే విషయం కూడా తమకి తెలియని ఒక స్థితిలో ఉంటారు. ఆ సమయంలోనే వాళ్లు ఒక శ్మశానంలోకి వెళతారు. అక్కడి సమాధులను కదిలిస్తారు. ఆ తరువాత అక్కడి నుంచి వెళ్లిపోతారు. దెబ్బతిన్న ఆ సమాధులలో నుంచి ఐదు ప్రేతాత్మలు బయటికి వస్తాయి. వాటి కారణంగా వాళ్లకి ఎలాంటి ఇబ్బందులు ఎదురవుతాయనేది మిగతా కథ. ఓటీటీ వైపు నుంచి ఈ సినిమాకి ఒక రేంజ్ రెస్పాన్స్ రావడం ఖాయమనే మాటైతే వినిపిస్తోంది మరి.