గ్రీస్లో భారత యూపీఐ సేవలు.. వాణిజ్య బంధం బలోపేతమే లక్ష్యం
- గ్రీస్లో అధికారికంగా ప్రారంభమైన యూపీఐ సేవలు
- కేంద్ర మంత్రి పీయూష్ గోయల్ సమక్షంలో ఏథెన్స్లో ప్రత్యక్ష ప్రదర్శన
- తక్కువ ఖర్చుతో తక్షణమే నగదు బదిలీ చేసుకునే వెసులుబాటు
- భారత్లో పెట్టుబడులు పెట్టాలని గ్రీక్ వ్యాపార, వాణిజ్య వర్గాలను ఆహ్వానించిన గోయల్
ఈ సందర్భంగా పీయూష్ గోయల్ మాట్లాడుతూ.. గ్రీస్లో యూపీఐ సేవలు అందుబాటులోకి రావడంతో అర్హులైన వినియోగదారులు తక్షణమే, అత్యంత సురక్షితంగా నగదు బదిలీ చేసుకోవచ్చని తెలిపారు. సంప్రదాయ పద్ధతులతో పోలిస్తే లావాదేవీల ఖర్చు దాదాపు నామమాత్రంగా ఉంటుందని ఆయన వివరించారు. సరిహద్దులు దాటి విలువను సృష్టించడం, ఉమ్మడి వృద్ధి కోసం భాగస్వామ్యాలను పెంపొందించడం లక్ష్యంగా సాంకేతిక పరిష్కారాలను నిర్మించాలన్న ప్రధాని మోదీ దార్శనికతకు ప్రపంచవ్యాప్తంగా యూపీఐకి లభిస్తున్న ఆదరణ నిదర్శనమని గోయల్ తన 'ఎక్స్' ఖాతాలో పేర్కొన్నారు.
తన గ్రీస్ పర్యటనలో భాగంగా గోయల్ యూరోబ్యాంక్ సీఈఓ ఫోకియోన్ కరావియాస్తో సమావేశమయ్యారు. భారత్-గ్రీస్ ఆర్థిక భాగస్వామ్యాన్ని మరింత విస్తరించడంపై ఫలవంతమైన చర్చలు జరిపారు. భారత్లో పెట్టుబడులు పెట్టాలని గ్రీక్ వ్యాపారవేత్తలను ప్రోత్సహించిన ఆయన, గ్రీస్లో తయారీ మరియు మౌలిక సదుపాయాల అభివృద్ధిలో సహకారానికి ఉన్న అవకాశాలను అన్వేషించారు. యూరోబ్యాంక్, ఎన్ఐపీఎల్ భాగస్వామ్యంతో ఈ సేవలు అందుబాటులోకి వచ్చాయి. ఈ కార్యక్రమంలో ఫెయిర్ఫాక్స్ డిజిటల్ సర్వీసెస్ సీఈఓ సంజయ్ తుగ్నైత్ కూడా పాల్గొన్నారు.
అంతకుముందు పీయూష్ గోయల్ గ్రీస్ డిప్యూటీ విదేశాంగ మంత్రి హ్యారీ థియోహారిస్తో కలిసి 'ఇండియా-గ్రీస్ బిజినెస్ ఫోరమ్'లో ప్రసంగించారు. భారతదేశ అద్భుతమైన వృద్ధి, బలమైన స్థూల ఆర్థిక పునాదులు గ్రీస్కు అపూర్వమైన అవకాశాలను అందిస్తున్నాయని ఆయన నొక్కిచెప్పారు. భారత్-ఈయూ స్వేచ్ఛా వాణిజ్య ఒప్పందం (ఎఫ్టీఏ) వాణిజ్యం, పెట్టుబడులు, ఆర్థిక సహకారంలో కొత్త అవకాశాలను సృష్టిస్తుందని ఆయన ఆశాభావం వ్యక్తం చేశారు. కీలక రంగాల్లో కలిసి పనిచేసేందుకు అపారమైన అవకాశాలున్నాయని భారత కంపెనీలతో చేతులు కలపాలని గ్రీక్ వ్యాపార వర్గాలకు ఆయన పిలుపునిచ్చారు. ఈ పర్యటన రెండు దేశాల మధ్య బలమైన వ్యాపార సంబంధాలకు, ఉమ్మడి శ్రేయస్సుకు మార్గం సుగమం చేస్తుందని ఆయన విశ్వాసం వ్యక్తం చేశారు.
