ఏపీలో విస్తారంగా వర్షాలు.. రెండు ద్రోణుల ప్రభావం
- ఏపీపై రెండు ద్రోణుల ప్రభావం కొనసాగుతోందన్న ఏపీఎస్డీఎంఏ ఎండీ ప్రఖర్ జైన్
- రెండు రోజుల పాటు ఈదురుగాలులతో కూడిన భారీ వర్షాలు కురిసే అవకాశం ఉందని వెల్లడి
- ఒక ద్రోణి ఉత్తర కోస్తాంధ్ర తీరం నుంచి ఛత్తీస్గఢ్ మీదుగా మహారాష్ట్ర వరకు విస్తరించి ఉందన్న ప్రఖర్ జైన్
- మరో ద్రోణి కర్ణాటక నుంచి రాయలసీమ, తమిళనాడు మీదుగా కన్యాకుమారి వరకు కొనసాగుతోందని వెల్లడి
ప్రస్తుతం ఒక ద్రోణి ఉత్తర కోస్తాంధ్ర తీరం నుంచి ఛత్తీస్గఢ్ మీదుగా మహారాష్ట్ర వరకు విస్తరించి ఉండగా, మరో ద్రోణి కర్ణాటక నుంచి రాయలసీమ, తమిళనాడు మీదుగా కన్యాకుమారి వరకు కొనసాగుతోందని ఆయన పేర్కొన్నారు. ఈ వాతావరణ వ్యవస్థల ప్రభావంతో రాష్ట్రంలోని పలు ప్రాంతాల్లో ఉరుములు, మెరుపులతో కూడిన మోస్తరు నుంచి భారీ వర్షాలు కురుస్తాయని వివరించారు.
ఆదివారం నాడు రాష్ట్రంలోని పలు జిల్లాల్లో గణనీయమైన వర్షపాతం నమోదైంది. గుంటూరు జిల్లా మంగళగిరిలో 68.2 మి.మీ, కాకుమానులో 51.5 మి.మీ, తాడేపల్లిలో 45.2 మి.మీ వర్షం కురిసింది. అలాగే విజయనగరం జిల్లా రాజంలో 52.5 మి.మీ, ఎన్టీఆర్ జిల్లా కవలూరులో 41.5 మి.మీ, బాపట్ల జిల్లా భట్టిప్రోలులో 39.9 మి.మీ వర్షపాతం నమోదైనట్లు అధికారులు వెల్లడించారు. రాజమండ్రిలో మధ్యాహ్నం కురిసిన భారీ వర్షానికి లోతట్టు ప్రాంతాలు, రహదారులు జలమయమయ్యాయి.
భారత వాతావరణ శాఖ (IMD) బులెటిన్ల ప్రకారం, సోమవారం కోస్తా జిల్లాల్లో ఉరుములతో కూడిన తేలికపాటి నుంచి మోస్తరు వర్షాలు, రాయలసీమలో అక్కడక్కడా తేలికపాటి జల్లులు పడే అవకాశం ఉంది. ఈ ద్రోణుల ప్రభావంతో రాష్ట్రంలో రుతుపవనాలు మరింత చురుకుగా సాగుతాయని వాతావరణ శాఖ అంచనా వేస్తోంది.
