నీట్ రీటెస్ట్: సైబరాబాద్ పరిధిలో 163 సెక్షన్.. కఠిన ఆంక్షలు

దేశవ్యాప్తంగా సంచలనం సృష్టించిన నీట్-యూజీ 2026 ప్రశ్నాపత్రం లీకేజీ ఉదంతం నేపథ్యంలో, జూన్ 21న నిర్వహించనున్న పునఃపరీక్షను అత్యంత పకడ్బందీగా జరిపేందుకు సైబరాబాద్ పోలీసులు కట్టుదిట్టమైన చర్యలు చేపట్టారు. పరీక్షా కేంద్రాల వద్ద ఎటువంటి అవాంఛనీయ సంఘటనలు చోటుచేసుకోకుండా ముందస్తు జాగ్రత్తగా సైబరాబాద్ కమిషనరేట్ పరిధిలో నిషేధాజ్ఞలు విధిస్తూ సీపీ డాక్టర్ ఎం. రమేశ్ శుక్రవారం ఉత్తర్వులు జారీ చేశారు.

భారతీయ నాగరిక్ సురక్షా సంహిత (బీఎన్ఎస్ఎస్) సెక్షన్ 163 ప్రకారం ఈ ఆంక్షలు అమలులోకి రానున్నాయి. ఆదివారం (జూన్ 21) ఉదయం 6 గంటల నుంచి సాయంత్రం 6 గంటల వరకు ఈ నిబంధనలు అమల్లో ఉంటాయని పోలీసులు స్పష్టం చేశారు. పరీక్షా కేంద్రాల నుంచి 200 మీటర్ల పరిధిలో ఐదుగురు లేదా అంతకంటే ఎక్కువ మంది గుమికూడటంపై నిషేధం విధించారు. అదేవిధంగా, కేంద్రాలకు 100 మీటర్ల లోపు ఉన్న ఇంటర్నెట్ కేఫ్‌లు, జిరాక్స్ సెంటర్లను మూసివేయాలని ఆదేశించారు. అయితే, విధుల్లో ఉన్న పోలీసు సిబ్బంది, ఫ్లయింగ్ స్క్వాడ్‌లు, సైనిక అధికారులు, హోంగార్డులతో పాటు అంత్యక్రియల ఊరేగింపులకు ఈ ఆంక్షల నుంచి మినహాయింపు కల్పించారు.

మే 3న జరిగిన నీట్-యూజీ పరీక్ష పత్రం లీకైనట్లు ఆరోపణలు రావడం, దేశవ్యాప్తంగా వెల్లువెత్తిన నిరసనల నేపథ్యంలో నేషనల్ టెస్టింగ్ ఏజెన్సీ (ఎన్టీఏ) ఆ పరీక్షను రద్దు చేసిన సంగతి తెలిసిందే. ఈ కుంభకోణంపై ప్రస్తుతం సీబీఐ దర్యాప్తు కొనసాగుతుండగా, జూన్ 21న పునఃపరీక్ష నిర్వహించాలని అధికారులు నిర్ణయించారు. తెలంగాణ వ్యాప్తంగా సుమారు 73,000 మంది విద్యార్థులు 208 కేంద్రాల్లో ఈ పరీక్షకు హాజరుకానున్నారు.

ఈ రీటెస్ట్‌ను సవాలు చేస్తూ దాఖలైన పిటిషన్లపై విచారణను సుప్రీంకోర్టు జూలైకి వాయిదా వేయడంతో పరీక్ష నిర్వహణకు మార్గం సుగమమైంది. ఇప్పటికే నెలకొన్న అనిశ్చితి, మానసిక ఒత్తిడితో ఆందోళన చెందుతున్న విద్యార్థులు, తల్లిదండ్రులకు భరోసా కల్పిస్తూ, పరీక్షను అత్యంత పారదర్శకంగా నిర్వహించేందుకు అన్ని ఏర్పాట్లు పూర్తి చేశామని అధికారులు స్పష్టం చేస్తున్నారు.