మరోసారి పెళ్లి పీటలెక్కిన ఊర్మిళా మాటోండ్కర్ మాజీ భర్త.. శ్రీనగర్ అమ్మాయితో నిఖా!

బాలీవుడ్ సీనియర్ నటి, రాజకీయ నాయకురాలు ఊర్మిళా మాటోండ్కర్ మాజీ భర్త, కశ్మీర్‌కు చెందిన మోడల్, వ్యాపారవేత్త మోహ్సిన్ అఖ్తర్ మీర్ రెండో వివాహం చేసుకున్నారు. శ్రీనగర్‌కు చెందిన నిధా భట్ అనే యువతిని అత్యంత నిరాడంబరంగా, కుటుంబ సభ్యుల సమక్షంలో సంప్రదాయబద్ధంగా నిఖా (వివాహం) చేసుకున్నారు. ఊర్మిళతో విడాకులు తీసుకుని విడిపోయిన దాదాపు రెండేళ్ల తర్వాత మోహ్సిన్ ఈ కొత్త జీవితాన్ని ప్రారంభించారు.

ఆదివారం (జూన్ 14) మోహ్సిన్ తన పెళ్లి వేడుకకు సంబంధించిన ఫొటోలను ఇన్‌స్టాగ్రామ్ వేదికగా అభిమానులతో పంచుకున్నారు. ఈ ఫొటోల్లో నూతన వధూవరులు ఇద్దరూ సాంప్రదాయక ఆఫ్-వైట్, క్రీమ్ కలర్ దుస్తుల్లో మెరిసిపోతూ కనిపించారు. ఉంగరాలు మార్చుకునే ఉత్సవంతో పాటు కుటుంబ సభ్యుల సమక్షంలో జరిగిన వివాహ క్షణాలను ఆయన సోషల్ మీడియాలో పోస్ట్ చేశారు.

ఈ ఫొటోలతో పాటు మోహ్సిన్ ఒక సుదీర్ఘమైన, భావోద్వేగపూరితమైన నోట్‌ను రాసుకొచ్చారు. "పరిశుద్ధమైన ఉద్దేశాలు, నిజాయతీ గల ప్రేమ, హృదయం నిండా ఓర్పు (సబర్), కృతజ్ఞత (శుకూర్) ఉన్నాయి. మీ ఆత్మను పవిత్రంగా ఉంచుకోండి, కాలంతో పాటు గాయాలను మాన్పుకోండి.. అల్లా రాసే స్క్రిప్ట్ ఎప్పుడూ అద్భుతంగా ఉంటుందని నమ్మండి. సరైన సమయంలో నా అందమైన భార్య నిధాను నా జీవితంలోకి పంపి, ఆమె నిజాయతీతో నన్ను అల్లా ఆశీర్వదించాడు. నా జీవితంలోకి వెలుగులు తెచ్చినందుకు ధన్యవాదాలు మై లవ్" అంటూ మోహ్సిన్ తన ఆనందాన్ని వ్యక్తపరిచారు. ఈ వివాహ బంధానికి తన పెద్దల ఆశీస్సులు ఎప్పుడూ ఉంటాయని పేర్కొన్నారు.

మోహ్సిన్ భార్య నిధా భట్ శ్రీనగర్‌కు చెందిన యువతి. పెళ్లి ప్రకటన వచ్చే వరకు వీరిద్దరి ప్రేమ వ్యవహారాన్ని మోహ్సిన్ చాలా రహస్యంగా ఉంచారు. 2016 ఫిబ్రవరిలో ఊర్మిళా మాటోండ్కర్‌ను మోహ్సిన్ మతాంతర వివాహం చేసుకున్నారు. వయసులో ఊర్మిళ కంటే మోహ్సిన్ చాలా చిన్నవాడు కావడంతో అప్పట్లో ఈ పెళ్లి సంచలనం సృష్టించింది. దాదాపు 8 ఏళ్ల పాటు కలిసి ఉన్న ఈ జంట, మనస్పర్థల కారణంగా 2024లో విడాకులు తీసుకున్నారు. ప్రస్తుతం మోహ్సిన్ షేర్ చేసిన వెడ్డింగ్ ఫొటోలపై బాలీవుడ్ ప్రముఖులతో పాటు అభిమానులు పెద్ద ఎత్తున శుభాకాంక్షలు తెలుపుతున్నారు.