ప్రేమ పెళ్లి చేసుకుందని కూతురిపై కన్నవారి పైశాచికం.. మెడపై కాలు పెట్టి నొక్కిన తండ్రి!

ప్రేమించి పెళ్లి చేసుకుందన్న ఆగ్రహంతో కన్న కూతురిపై తల్లిదండ్రులే పైశాచికంగా దాడి చేశారు. జుట్టు పట్టి ఈడ్చుకెళ్లి, కింద పడేసి చితకబాదారు. అంతటితో ఆగకుండా తండ్రి ఆమె మెడపై కాలు పెట్టి నొక్కడం అత్యంత దారుణం. బీహార్‌లోని మాధేపురా జిల్లాలో జరిగిన ఈ అమానవీయ ఘటనకు సంబంధించిన వీడియో సోషల్ మీడియాలో వైరల్ కావడంతో పోలీసులు రంగంలోకి దిగి దర్యాప్తు ప్రారంభించారు.

వివరాల్లోకి వెళితే.. మాధేపురా జిల్లాలోని ఓ గ్రామానికి చెందిన పూజా కుమారి (22), అదే ప్రాంతానికి చెందిన బిట్టు కుమార్ (17) ప్రేమించుకున్నారు. సుమారు నెల రోజుల క్రితం ఇద్దరూ వివాహం చేసుకున్నారు. వారిద్దరూ బంధువులు కావడం, ఇళ్లు కూడా దగ్గరదగ్గరగా ఉండటంతో ఈ వివాహం గురించి తెలియగానే ఇరు కుటుంబాల మధ్య తీవ్ర ఉద్రిక్తతలు నెలకొన్నాయి. ఈ సమస్యను పరిష్కరించడానికి గ్రామస్థులు పంచాయితీ నిర్వహించారు. విచారణ జరిపిన పంచాయితీ, జంటను విడదీయాలని తీర్పు ఇచ్చింది. అంతేకాకుండా అబ్బాయి కుటుంబానికి రూ.1 లక్ష జరిమానా విధించి, ఆ మొత్తాన్ని అమ్మాయి కుటుంబానికి చెల్లించాలని ఆదేశించింది.

పంచాయితీ తీర్పు తర్వాత పూజా తల్లిదండ్రులు ఆమెకు నచ్చజెప్పి అత్తవారింటి నుంచి పుట్టింటికి తిరిగి తీసుకొచ్చారు. అయితే, ఆమె ఇంటికి వచ్చిన వెంటనే పరిస్థితి హింసాత్మకంగా మారింది. ఈ నెల 8వ తేదీన గ్రామస్థులందరూ చూస్తుండగానే పూజా తల్లి ఆమె జుట్టు పట్టి లాగి కిందపడేయగా, తండ్రి కూడా తీవ్రంగా కొట్టాడు. కూతురి మెడపై తండ్రి కాలు పెట్టి నొక్కి ఉంచిన దృశ్యాలు అందరినీ దిగ్భ్రాంతికి గురిచేశాయి.

ఈ దాడికి సంబంధించిన వీడియో సోషల్ మీడియాలో వైరల్ కావడంతో విషయం పోలీసుల దృష్టికి వెళ్లింది. వెంటనే స్పందించిన పోలీసులు యువతిని తమ సంరక్షణలోకి తీసుకుని పోలీస్ స్టేషన్‌కు తరలించారు. ఈ ఘటనపై శంకర్‌పూర్ ఎస్హెచ్‌ఓ రాజీవ్ కుమార్ ఎన్డీటీవీతో ఫోన్‌లో మాట్లాడారు. బాధితురాలి నుంచి లిఖితపూర్వకంగా ఫిర్యాదు స్వీకరించామని, వైరల్ వీడియో, ఫిర్యాదు ఆధారంగా దర్యాప్తు చేస్తున్నామని ఆయన తెలిపారు. ఈ ఘటనలో దోషులుగా తేలిన వారిపై చట్టప్రకారం కఠిన చర్యలు తీసుకుంటామని ఆయన స్పష్టం చేశారు.