లిక్కర్ స్కామ్‌లో సూత్రధారి జగనే: మంత్రి డోలా తీవ్ర ఆరోపణలు

గత వైసీపీ ప్రభుత్వ హయాంలో జరిగిన మద్యం కుంభకోణంలో అసలు సూత్రధారి, ప్రధాన లబ్ధిదారుడు మాజీ ముఖ్యమంత్రి వైఎస్ జగన్ మోహన్ రెడ్డి అని రాష్ట్ర మంత్రి డోలా శ్రీబాలవీరాంజనేయస్వామి సంచలన ఆరోపణలు చేశారు. జగన్ వ్యక్తిగత సహాయకుడు (పీఏ) కేఎన్‌ఆర్ వందల కోట్లు కొల్లగొట్టారంటే, ఇక జగన్ ప్రమేయం ఏ స్థాయిలో ఉంటుందో అర్థం చేసుకోవచ్చని ఆయన పేర్కొన్నారు.

శనివారం మంగళగిరిలోని టీడీపీ కేంద్ర కార్యాలయంలో ఆయన మీడియాతో మాట్లాడారు. ఆంధ్రప్రదేశ్ స్టేట్ బెవరేజెస్ కార్పొరేషన్ ఎండీగా వాసుదేవ రెడ్డిని నియమించి, ఆ సంస్థ ద్వారా సుమారు రూ.3,500 కోట్లు దుర్వినియోగం చేశారని ఆరోపించారు. గత ప్రభుత్వ హయాంలో సరఫరా చేసిన 'జె-బ్రాండ్' మద్యంలో దేశంలో మరెక్కడా లేని విధంగా అత్యంత ప్రమాదకరమైన రసాయనాలు ఉన్నాయని విమర్శించారు.

ఈ కుంభకోణంలో చెవిరెడ్డి భాస్కర్ రెడ్డి, కారుమూరి నాగేశ్వరరావు, మిథున్ రెడ్డి వంటి వైసీపీ నేతలు ఈడీ విచారణను ఎదుర్కోక తప్పదని డోలా స్పష్టం చేశారు. గత ప్రభుత్వ హయాంలో జరిగిన ఈ మద్యం కుంభకోణంపై కేంద్ర ఏజెన్సీలతో పాటు రాష్ట్ర ప్రభుత్వం ఏర్పాటు చేసిన ప్రత్యేక దర్యాప్తు బృందం (సిట్) కూడా విచారణ జరుపుతున్న విషయం తెలిసిందే.

ఇటీవల జగన్ మాజీ పీఏ కేఎన్‌ఆర్ నివాసంలో సిట్ అధికారులు సోదాలు నిర్వహించిన నేపథ్యంలో, మంత్రి డోలా చేసిన వ్యాఖ్యలు రాజకీయ వర్గాల్లో ప్రాధాన్యత సంతరించుకున్నాయి.