హైదరాబాద్లో థమన్ 'ఓజీ' షోకు వరుణుడి దెబ్బ.. చివరి నిమిషంలో రద్దు
- భారీ వర్షాలు, ఈదురుగాలులే కారణంగా రద్దు నిర్ణయం
- రెండోసారి వాయిదా పడటంతో అభిమానుల్లో తీవ్ర నిరాశ
- హృదయం ముక్కలైందంటూ తమన్ ఎమోషనల్ పోస్ట్
- త్వరలోనే కొత్త తేదీ ప్రకటిస్తామన్న నిర్వాహకులు
శనివారం మధ్యాహ్నం నుంచి కురుస్తున్న కుండపోత వర్షాల కారణంగా కన్సర్ట్ ప్రాంగణం జలమయమైంది. వర్షం ధాటికి కొన్ని సంగీత పరికరాలు కూడా దెబ్బతిన్నట్లు సమాచారం. సాయంత్రం 6:30 గంటలకు షో ప్రారంభం కావాల్సి ఉండగా, వాతావరణం ఏమాత్రం అనుకూలించకపోవడంతో నిర్వాహకులు ఈ నిర్ణయం తీసుకున్నారు.
ఈ షో రద్దు కావడంపై తమన్ 'ఎక్స్' (ట్విట్టర్) వేదికగా తీవ్ర ఆవేదన వ్యక్తం చేశారు. "ఈ వార్త నా హృదయాన్ని ముక్కలు చేసింది. గత 45 రోజులుగా నా టీమ్లోని 56 మంది సభ్యులు ఈ ఈవెంట్ కోసం ఎంతో కష్టపడ్డారు. కానీ మనం ఒకటి తలిస్తే దైవం మరొకటి తలిచింది. ఆయనపై నాకు పూర్తి నమ్మకం ఉంది. అభిమానుల ప్రేమతో మరింత బలంగా తిరిగి వస్తాను" అని ఆయన భావోద్వేగంగా పోస్ట్ చేశారు.
పవన్ కల్యాణ్ కథానాయకుడిగా నటిస్తున్న 'దే కాల్ హిమ్ ఓజీ' (They Call Him OG) చిత్ర సంగీతాన్ని పురస్కరించుకుని ఈ టూర్ను నిర్వహిస్తున్నారు. నిజానికి ఈ కన్సర్ట్ తొలుత జూన్ 6న జరగాల్సి ఉండగా, అప్పుడు కూడా ప్రతికూల వాతావరణ పరిస్థితుల వల్లే వాయిదా పడింది. ఇప్పుడు రెండోసారి కూడా వాయిదా పడటంతో అభిమానులు తీవ్ర నిరాశ చెందారు. హైదరాబాద్ షోకు సంబంధించి త్వరలోనే కొత్త తేదీని ప్రకటిస్తామని నిర్వాహక సంస్థలు ఏసీటీసీ (ACTC) ఈవెంట్స్, క్యాప్స్టాక్ (Capstack) వెల్లడించాయి.
