ఫుట్బాల్ స్టార్ ని చేస్తానంటూ మైనర్పై కోచ్ మూడేళ్ల పాటు అత్యాచారం!
- మైనర్ ఫుట్బాల్ క్రీడాకారిణిపై లైంగిక దాడి
- కెరీర్ పేరుతో నమ్మించి వేధింపులు
- వీడియోలతో బ్లాక్మెయిల్ చేసిన కోచ్
- పోక్సో చట్టం కింద కేసు నమోదు
పోలీసుల వివరాల ప్రకారం.. బాధిత బాలిక 2023లో వసాయిలోని అతడి ఫుట్బాల్ అకాడమీలో శిక్షణ కోసం చేరింది. ఈ క్రమంలో ఆమె దగ్గర నమ్మకం సంపాదించుకున్న కోచ్, ఫుట్బాల్లో పెద్ద అవకాశాలు కల్పిస్తానని హామీ ఇచ్చాడు. ఆ తర్వాత పలుమార్లు ఆమెపై లైంగిక దాడికి పాల్పడినట్లు ఆరోపణలు వస్తున్నాయి. అంతేకాకుండా బాలికకు తెలియకుండా అభ్యంతరకర వీడియోలు, ఫొటోలు కూడా రికార్డు చేసినట్లు పోలీసులు తెలిపారు. కొంతకాలం తర్వాత వాటిని సోషల్ మీడియాలో వైరల్ చేస్తానంటూ బెదిరిస్తూ బ్లాక్మెయిల్కు పాల్పడినట్లు ఫిర్యాదులో పేర్కొంది.
నిరంతర వేధింపులు, మానసిక ఒత్తిడిని తట్టుకోలేకపోయిన బాలిక చివరకు జరిగిన విషయాన్ని కుటుంబ సభ్యులకు వెల్లడించింది. దీంతో కుటుంబ సభ్యులు పోలీసులను ఆశ్రయించారు. బాధితురాలి ఫిర్యాదు ఆధారంగా ప్రాథమిక విచారణ చేపట్టిన పోలీసులు నిందితుణ్ని అదుపులోకి తీసుకున్నారు. అత్యాచారం, బెదిరింపులు, బాలల లైంగిక నేరాల నిరోధక చట్టం (పోక్సో)లోని పలు కఠిన సెక్షన్ల కింద కేసులు నమోదు చేశారు. ప్రస్తుతం అతణ్ని కస్టడీకి తరలించినట్లు పోలీసులు తెలిపారు.
