ఐఫోన్ ప్రియులకు శుభవార్త.. ఐఫోన్ 17 ప్రొ మ్యాక్స్‌పై భారీ డిస్కౌంట్

ఆపిల్ నుంచి వచ్చిన లేటెస్ట్ ఫ్లాగ్‌షిప్ స్మార్ట్‌ఫోన్ ఐఫోన్ 17 ప్రొ మ్యాక్స్ కొనుగోలు చేయాలనుకునే వారికి ప్రముఖ ఎలక్ట్రానిక్స్ రిటైల్ సంస్థ రిలయన్స్ డిజిటల్ ఒక అద్భుతమైన ఆఫర్‌ను ప్రకటించింది. ఫ్లాట్ డిస్కౌంట్, బ్యాంక్ ఆఫర్లను కలుపుకొని ఈ ఫోన్‌పై ఏకంగా రూ.11,508 వరకు తగ్గింపును అందిస్తోంది. ప్రస్తుతం మార్కెట్లో ఉన్న ఇతర ఆన్‌లైన్ వేదికలతో పోలిస్తే ఇదే అతిపెద్ద ఆఫర్‌గా నిలుస్తోంది.

ఆఫర్ వివరాలు ఇవే..
భారత మార్కెట్లో ఐఫోన్ 17 ప్రో మ్యాక్స్ (256GB) వేరియంట్ అసలు ధర రూ.1,49,900గా ఉంది. రిలయన్స్ డిజిటల్ తన ఆన్‌లైన్ స్టోర్‌లో దీనిపై నేరుగా రూ.4,910 తక్షణ తగ్గింపును అందిస్తూ రూ.1,44,990కే జాబితా చేసింది. దీనికి అదనంగా, ఎంపిక చేసిన ఎస్‌బీఐ, ఐసీఐసీఐ, యాక్సిస్ బ్యాంక్ క్రెడిట్ కార్డులతో కొనుగోలు చేస్తే రూ.6,598 వరకు క్యాష్‌బ్యాక్ లభిస్తుంది. దీంతో అన్ని ఆఫర్లు పోగా, ఈ ఫోన్ తుది ధర రూ.1,38,392కే అందుబాటులోకి వస్తుంది.

కొనాలా?.. ఆగాలా?
ఐఫోన్ 17 ప్రొ మ్యాక్స్ అత్యాధునిక A19 ప్రో చిప్‌సెట్, వేడెక్కకుండా నిరోధించే వేపర్ ఛాంబర్ కూలింగ్ సిస్టమ్, 48 మెగాపిక్సెల్ ట్రిపుల్ కెమెరా సెటప్‌ వంటి శక్తిమంతమైన ఫీచర్లతో వస్తోంది. అయితే, మరికొన్ని నెలల్లో ఆపిల్ నుంచి ఐఫోన్ 18 సిరీస్ విడుదల కానుంది. ఇందులో మరింత శక్తివంతమైన A20 ప్రొ చిప్, పెద్ద బ్యాటరీ, మెరుగైన కెమెరా వంటి అప్‌గ్రేడ్లు ఉండే అవకాశం ఉందని టెక్ వర్గాలు అంచనా వేస్తున్నాయి.

సాధారణంగా కొత్త మోడల్ వచ్చిన తర్వాత పాత మోడళ్ల ధరలు అధికారికంగా తగ్గుతాయి. ఈ నేపథ్యంలో, తక్షణమే ఒక ప్రీమియం ఫోన్ కొనాలనుకునే వారికి రిలయన్స్ డిజిటల్ అందిస్తున్న ఈ డీల్ ఒక మంచి ఎంపికగా చెప్పవచ్చు. లేదంటే, ఐఫోన్ 18 సిరీస్ విడుదల లేదా పండుగ సీజన్ సేల్స్ వరకు వేచి చూడటం మేలని నిపుణులు సూచిస్తున్నారు.