మ‌రో రెండు రోజుల్లో ఫిఫా వరల్డ్ కప్ సందడి.. భారత్‌లో ఎక్కడ చూడొచ్చంటే?

ఫుట్‌బాల్ అభిమానులు ఎప్పుడెప్పుడా అని ఎదురుచూస్తున్న అతిపెద్ద క్రీడా పండుగ, ఫిఫా ప్రపంచకప్ 2026కు రంగం సిద్ధమైంది. భారత కాలమానం ప్రకారం జూన్ 12 నుంచి ఈ మెగా టోర్నమెంట్ ప్రారంభం కానుంది. ఈసారి చరిత్రలో తొలిసారిగా 48 జట్లు టైటిల్ కోసం పోటీ పడుతుండటం విశేషం. అమెరికా, మెక్సికో, కెనడా దేశాలు సంయుక్తంగా ఆతిథ్యం ఇస్తున్న ఈ ప్రపంచకప్‌లో మొత్తం 104 మ్యాచ్‌లు జరగనున్నాయి.

కొత్త ఫార్మాట్‌తో మరింత ఆసక్తి
ఈసారి టోర్నమెంట్ ఫార్మాట్‌లో కీలక మార్పులు చేశారు. గతంలో ఉన్న 8 గ్రూపుల స్థానంలో ఇప్పుడు 12 గ్రూపులను ప్రవేశపెట్టారు. ప్రతి గ్రూపులో నాలుగు జట్లు ఉంటాయి. గ్రూపులోని ప్రతీ జట్టు నుంచి మొదటి రెండు స్థానాల్లో నిలిచిన జట్లతో పాటు, మూడో స్థానంలో నిలిచిన ఉత్తమ 8 జట్లు నాకౌట్ దశకు అర్హత సాధిస్తాయి. దీంతో సంప్రదాయ 'రౌండ్ ఆఫ్ 16'కు ముందు కొత్తగా 'రౌండ్ ఆఫ్ 32' దశను కూడా చూడబోతున్నాం. ఈ మార్పుల వల్ల టోర్నమెంట్ మరింత ఆసక్తికరంగా మారింది.

భారత అభిమానుల కోసం ప్రసార వివరాలు
ఈ మెగా టోర్నమెంట్‌లో భారత్ పాల్గొననప్పటికీ, దేశవ్యాప్తంగా ఫుట్‌బాల్ అభిమానుల్లో తీవ్రమైన ఆసక్తి నెలకొంది. తమ అభిమాన ఫుట్‌బాల్ స్టార్లు ప్రపంచ వేదికపై తలపడటాన్ని చూసేందుకు ఉత్సాహంగా ఉన్నారు. అయితే, టోర్నమెంట్ ప్రసారాలపై ఇప్పటివరకు నెలకొన్న సందిగ్ధతకు తెరపడింది. భారత ప్రేక్షకులు కూడా మ్యాచ్‌లను ప్రత్యక్షంగా వీక్షించేందుకు ఏర్పాట్లు పూర్తయ్యాయి.

టీవీలో ఎక్కడ చూడాలి?
భారతదేశంలో ఫిఫా ప్రపంచకప్ 2026 మ్యాచ్‌లను కొత్తగా ప్రారంభించిన 'యునైట్8 స్పోర్ట్స్' నెట్‌వర్క్‌లో ప్రత్యక్ష ప్రసారం చేయనున్నారు. మొత్తం నాలుగు ఛానెళ్లలో మ్యాచ్‌లు అందుబాటులో ఉంటాయి. హిందీ కామెంటరీ కోసం 'యునైట్8 స్పోర్ట్స్ 1', 'యునైట్8 స్పోర్ట్స్ 1 హెచ్‌డీ' ఛానెళ్లను చూడవచ్చు. అదేవిధంగా ఇంగ్లీష్ కామెంటరీ కోసం 'యునైట్8 స్పోర్ట్స్ 2', 'యునైట్8 స్పోర్ట్స్ 2 హెచ్‌డీ' ఛానెళ్లు కేటాయించారు.

లైవ్ స్ట్రీమింగ్ ఎక్కడ?
ఇక డిజిటల్ వీక్షకుల కోసం, మ్యాచ్‌ల లైవ్ స్ట్రీమింగ్‌ను 'జీ5' (Zee5) యాప్‌లో అందిస్తున్నారు. ఫుట్‌బాల్ అభిమానులు తమ మొబైల్, ల్యాప్‌టాప్ లేదా స్మార్ట్ టీవీలలో జీ5 యాప్ ద్వారా మ్యాచ్‌లను ప్రత్యక్షంగా వీక్షించవచ్చు.

టోర్నమెంట్‌లోని గ్రూపుల వివరాలు:
గ్రూప్ A: మెక్సికో, దక్షిణాఫ్రికా, రిపబ్లిక్ ఆఫ్ కొరియా, చెకియా
గ్రూప్ B: కెనడా, స్విట్జర్లాండ్, ఖతార్, బోస్నియా అండ్ హెర్జెగోవినా
గ్రూప్ C: బ్రెజిల్, మొరాకో, స్కాట్లాండ్, హైతీ
గ్రూప్ D: యూఎస్ఏ, పరాగ్వే, ఆస్ట్రేలియా, టర్కీ
గ్రూప్ E: జర్మనీ, ఈక్వెడార్, ఐవరీ కోస్ట్, కురాకో
గ్రూప్ F: నెదర్లాండ్స్, జపాన్, స్వీడన్, ట్యునీషియా
గ్రూప్ G: బెల్జియం, ఈజిప్ట్, ఇరాన్, న్యూజిలాండ్
గ్రూప్ H: స్పెయిన్, ఉరుగ్వే, సౌదీ అరేబియా, కేప్ వెర్డే
గ్రూప్ I: ఫ్రాన్స్, సెనెగల్, నార్వే, ఇరాక్
గ్రూప్ J: అర్జెంటీనా, ఆస్ట్రియా, అల్జీరియా, జోర్డాన్
గ్రూప్ K: పోర్చుగల్, కొలంబియా, డీఆర్ కాంగో, ఉజ్బెకిస్థాన్
గ్రూప్ L: ఇంగ్లండ్, క్రొయేషియా, ఘనా, పనామా