భారత క్రికెట్ చరిత్రలో ఒక సంచలనం నమోదైంది. కేవలం 15 ఏళ్ల వయసులోనే బీహార్‌కు చెందిన యువ కెరటం వైభవ్ సూర్యవంశీ భారత జాతీయ జట్టుకు ఎంపికై చరిత్ర సృష్టించాడు. తద్వారా అత్యంత పిన్న వయసులో టీమిండియాకు ఎంపికైన ఆటగాడిగా క్రికెట్ దిగ్గజం సచిన్ టెండూల్కర్ (16 ఏళ్ల 205 రోజులు) పేరిట ఉన్న రికార్డును అతను బద్దలు కొట్టాడు. ఐపీఎల్ 2026 సీజన్‌లో రాజస్థాన్ రాయల్స్ తరఫున ఆకాశమే హద్దుగా చెలరేగిన ప్రదర్శనే అతనికి ఈ అరుదైన గౌరవాన్ని అందించింది.

ఐపీఎల్‌ను షేక్ చేసిన వైభవ్ 
ఎడమచేతి వాటం ఓపెనర్ అయిన వైభవ్ సూర్యవంశీ, ఐపీఎల్ 2026 సీజన్‌లో అసాధారణమైన బ్యాటింగ్‌తో యావత్ క్రికెట్ ప్రపంచం దృష్టిని ఆకర్షించాడు. టోర్నమెంట్‌లో కేవలం 16 ఇన్నింగ్స్‌లలో 48.50 సగటు, 237.30 అనే నమ్మశక్యం కాని స్ట్రైక్ రేట్‌తో ఏకంగా 776 పరుగులు సాధించాడు. దీంతో అత్యధిక పరుగులు చేసిన బ్యాటర్‌గా 'ఆరెంజ్ క్యాప్‌'ను సొంతం చేసుకున్నాడు. 

ఈ సీజన్‌లో వైభవ్ పవర్ హిట్టింగ్ గురించి ప్రత్యేకంగా చెప్పుకోవాలి. మొత్తం 72 సిక్సర్లు బాది, ఒకే ఐపీఎల్ సీజన్‌లో అత్యధిక సిక్సర్లు కొట్టిన ఆటగాడిగా సరికొత్త రికార్డు సృష్టించాడు. ఈ క్రమంలో యూనివర్సల్ బాస్ క్రిస్ గేల్ పేరిట ఉన్న రికార్డును తుడిచిపెట్టాడు. అతని అద్భుత ప్రదర్శనకు గుర్తింపుగా 'ఆరెంజ్ క్యాప్‌'తో పాటు మోస్ట్ వాల్యుబుల్ ప్లేయర్ (ఎంవీపీ), ఎమర్జింగ్ ప్లేయర్ ఆఫ్ ది సీజన్, సూపర్ స్ట్రైకర్, సూపర్ సిక్సెస్ అవార్డులను కూడా కైవసం చేసుకుని టోర్నమెంట్‌లో పూర్తి ఆధిపత్యం ప్రదర్శించాడు.

భారత క్రికెట్‌లో నూతన శకం
అటు అండర్-19 భారత జట్టుకు ప్రాతినిధ్యం వహించి కీలక టోర్నమెంట్లలో రాణించాడు. ఐపీఎల్‌లో రాజస్థాన్ రాయల్స్ జట్టు అతడిని కొనుగోలు చేయడంతో అంతర్జాతీయ బౌలర్లను సైతం నిర్భయంగా ఎదుర్కొని తనకంటూ ఒక ప్రత్యేక గుర్తింపు తెచ్చుకున్నాడు. కేవలం కొద్ది కాలంలోనే అండర్-19 స్థాయి నుంచి జాతీయ జట్టులోకి ఎదగడం అతని ప్రతిభకు, పట్టుదలకు నిదర్శనం. 15 ఏళ్లకే టీమిండియా పిలుపు అందుకోవడం భారత క్రికెట్‌లో ఒక నూతన శకానికి నాంది పలికినట్లేనని క్రీడా విశ్లేష‌కులు అభిప్రాయపడుతున్నారు.

ప్రస్తుతం వైభవ్ సూర్యవంశీ ముక్కోణపు టోర్నీ కోసం శ్రీలంకలో ఉన్నాడు. ఈ టోర్నీలో భారత్, శ్రీలంక, ఆఫ్ఘనిస్థాన్ దేశాల 'ఏ' జట్లు ఆడుతున్నాయి. 'భారత్ ఏ' జట్టు తరఫున వైభవ్ ఎలా ఆడతాడన్నది సర్వత్రా ఆసక్తి కలిగిస్తోంది.