హైదరాబాద్ చారిత్రక నీలోఫర్ కేఫ్... త్వరలో కొత్త బ్రాంచ్... ఎక్కడంటే...!

హైదరాబాద్ నగరవాసుల టీ సంస్కృతిలో దశాబ్దాలుగా భాగమైపోయిన ప్రఖ్యాత 'కేఫ్ నిలోఫర్' ఇప్పుడు తన కార్యకలాపాలను మరింత విస్తరిస్తోంది. నగరంలోని కొంపల్లిలో అత్యంత భారీ, కొత్త ఔట్‌లెట్‌ను ఏర్పాటు చేయనుంది. ఇరానీ చాయ్, బన్ మస్కా వంటి తమ ప్రత్యేక రుచులను ఈ ప్రాంత ప్రజలకు అందించేందుకు సిద్ధమైంది.

కొంపల్లిలోని 'ఫెయిర్‌మౌంట్ డౌన్‌టౌన్' కమర్షియల్ కాంప్లెక్స్‌లో సుమారు 36,000 చదరపు అడుగుల విశాలమైన స్థలాన్ని కేఫ్ నిలోఫర్‌కు లీజుకు ఇచ్చినట్లు ఫెయిర్‌మౌంట్ బిల్డర్స్ ప్రకటించింది. ఇప్పటికే హైటెక్ సిటీలో ఉన్న ఫ్లాగ్‌షిప్ బ్రాంచ్ తరహాలోనే ఈ కొత్త ఔట్‌లెట్‌ను కూడా మల్టీ-లెవల్ ప్రీమియం లాంజ్‌గా తీర్చిదిద్దనున్నారని సమాచారం. దీని ద్వారా సంప్రదాయ టీ అనుభవాన్ని ఒక విలాసవంతమైన జీవనశైలికి అనుగుణంగా మార్చనున్నారు.

కొన్ని దశాబ్దాల క్రితం ఒక చిన్న కేఫ్‌గా ప్రారంభమైన నిలోఫర్, నేడు హైదరాబాద్‌ సాంస్కృతిక చిహ్నంగా మారింది. 2025లో హైటెక్ సిటీలో దాదాపు 40,000 చదరపు అడుగుల విస్తీర్ణంలో దేశంలోనే అతిపెద్ద టీ కేఫ్‌ను ప్రారంభించి నిలోఫర్ వార్తల్లో నిలిచింది. ఈ విస్తరణతో సెంట్రల్, వెస్ట్రన్ హైదరాబాద్‌లకు మాత్రమే పరిమితమైన నిలోఫర్, ఇప్పుడు నగరంలోని ఇతర ప్రాంతాలకూ చేరువవుతోంది.

అయితే, ఈ విస్తరణపై మిశ్రమ స్పందనలు వ్యక్తమవుతున్నాయి. కొంపల్లి, దాని పరిసర ప్రాంతాల ప్రజలు కొత్త ఔట్‌లెట్ రాకపై సంతోషం వ్యక్తం చేస్తుండగా, పాత కస్టమర్లు మాత్రం పెరుగుతున్న ధరలపై సోషల్ మీడియాలో ఆందోళన వ్యక్తం చేస్తున్నారు. కొత్త ఔట్‌లెట్లలో మౌలిక సదుపాయాలు, సేవలకు అనుగుణంగా ధరలు పెంచినప్పటికీ, పాత రుచుల స్ఫూర్తిని నిలబెట్టుకునే ప్రయత్నం చేస్తున్నామని యాజమాన్యం చెబుతోంది. ఈ కేఫ్ ప్రారంభ తేదీని ఇంకా ప్రకటించవలసి ఉంది.