గంజాయి అమ్మకాలను ప్రశ్నించినందుకు ఘోరం.. చెన్నైలో యువకుడిని కొట్టి చంపిన వైనం

తమ ప్రాంతంలో డ్రగ్స్ (గంజాయి) విక్రయాలను ప్రశ్నించినందుకు చెన్నైలో విష్ణు (23) అనే యువకుడు దారుణ హత్యకు గురికావడం స్థానికంగా కలకలం రేపింది. ఈ ఘటనపై ప్రతిపక్ష ఎఐఎడిఎంకె (AIADMK) తీవ్రంగా స్పందించింది. తమిళనాడులో మాదకద్రవ్యాల నియంత్రణలో, శాంతిభద్రతల పరిరక్షణలో రాష్ట్ర ప్రభుత్వం పూర్తిగా విఫలమైందంటూ అధికార పీఠంపై పదునైన విమర్శలు గుప్పించింది. సోమవారం తొండియార్‌పేట ప్రాంతంలో స్థానికంగా గంజాయి విక్రయిస్తున్న ఒక ముఠాను విష్ణు నిలదీశాడు. దీంతో ఆగ్రహానికి గురైన ఆ గ్యాంగ్.. విష్ణును చుట్టుముట్టి బీరు సీసాలు, సుత్తి, ఇతర మారణాయుధాలతో విచక్షణరహితంగా దాడి చేసింది. తీవ్ర గాయాలపాలైన అతడిని చికిత్స నిమిత్తం ఆసుపత్రికి తరలించినప్పటికీ ఫలితం లేకుండా పోయింది. ఈ ఘోరానికి సంబంధించి పోలీసులు కేసు నమోదు చేసుకుని దర్యాప్తు ప్రారంభించారు.

ఈ హత్య తమిళనాడు రాజకీయాల్లో తీవ్ర దుమారం రేపింది. ఎఐఎడిఎంకె ప్రధాన కార్యదర్శి, మాజీ ముఖ్యమంత్రి ఎడప్పాడి కె.పళనిస్వామి (ఈపీఎస్) ముఖ్యమంత్రి విజయ్ నేతృత్వంలోని ప్రభుత్వంపై ఎక్స్ వేదికగా విరుచుకుపడ్డారు. "ఈ ప్రభుత్వంలో మాదకద్రవ్యాల వ్యాప్తిని ప్రశ్నిస్తే హత్యే సమాధానమా? వీరు చెబుతున్న మార్పు ఇదేనా?" అని ప్రశ్నించారు. మంగళవారం తిరుచిరాపల్లిలో ముఖ్యమంత్రి విజయ్ మాట్లాడుతూ.. తనపై నిరాధారమైన ఆరోపణలు వస్తున్నాయని వ్యక్తంచేసిన అసహనాన్ని ఈ సందర్భంగా పళనిస్వామి ప్రస్తావించారు. కేవలం అధికారులను నియమిస్తేనే సరిపోతుందా అని, ప్రతి ప్రభుత్వంలోనూ పనిచేసేది ఈ అధికారులేనని, మార్పు అనేది పాలకుల నుంచి రావాలని ఆయన హితవు పలికారు.

పోలీస్ శాఖను తన ఆధీనంలో ఉంచుకున్న వ్యక్తి, శాంతిభద్రతల బాధ్యత నుంచి తప్పుకోవాలని చూడటం సిగ్గుచేటని, డ్రగ్స్ మహమ్మారిని తాను నిర్మూలించలేకపోతున్నానని ముఖ్యమంత్రి పరోక్షంగా అంగీకరించినట్లేనని పళనిస్వామి ఆరోపించారు. 'పరిపాలన ఎలా చేయాలి' అనే ఆరు నెలల క్రాష్ కోర్సును మీరు పూర్తి చేసే వరకు ప్రజలు ఇలాగే ప్రాణాలు కోల్పోతూ బాధపడాలా? కనీసం ఎవరూ ప్రశ్నించడానికి కూడా వీల్లేదా? అంటూ తీవ్రస్థాయిలో నిలదీశారు.