మళ్లీ పెరిగిన బంగారం, వెండి.. ప్రధాన నగరాల్లో నేటి ధరలివే!

అంతర్జాతీయ మార్కెట్‌లో నెలకొన్న అనిశ్చితి, భౌగోళిక రాజకీయ ఉద్రిక్తతల ప్రభావంతో బంగారం, వెండి ధరలు మరోసారి స్వల్పంగా పెరిగాయి. ముఖ్యంగా అమెరికా-ఇరాన్ మధ్య ఉద్రిక్తతలు, డాలర్ మారకం విలువలో హెచ్చుతగ్గుల కారణంగా పసిడిని సురక్షితమైన పెట్టుబడిగా భావిస్తుండటంతో డిమాండ్ నిలకడగా కొనసాగుతోంది. శనివారం ఉదయం దేశీయ మార్కెట్‌లో బంగారం, వెండి ధరల్లో పెరుగుదల నమోదైంది.

గుడ్ రిటర్న్స్ వెబ్‌సైట్ అందించిన సమాచారం ప్రకారం, శనివారం ఉదయం హైదరాబాద్, విజయవాడ మార్కెట్లలో 24 క్యారెట్ల 10 గ్రాముల బంగారం ధర రూ.1,57,650గా ఉంది. అదేవిధంగా, 22 క్యారెట్ల ఆభరణాల బంగారం ధర 10 గ్రాములకు రూ.1,44,510గా పలికింది. దేశ రాజధాని ఢిల్లీలో 24 క్యారెట్ల తులం బంగారం ధర రూ.1,57,800 వద్ద ఉండగా, 22 క్యారెట్ల బంగారం ధర రూ.1,44,660గా నమోదైంది.

మరోవైపు వెండి ధరలు కూడా స్వల్పంగా పెరిగాయి. కిలో వెండిపై రూ.100 మేర పెరుగుదల కనిపించింది. ప్రస్తుతం హైదరాబాద్, విజయవాడ, చెన్నైలలో కిలో వెండి ధర రూ.2,90,100గా ఉంది. ఢిల్లీ, బెంగళూరు మార్కెట్లలో కిలో వెండి ధర రూ.2,80,100గా ట్రేడ్ అవుతోంది. అంతర్జాతీయ పరిణామాలు ఇలాగే కొనసాగితే బులియన్ మార్కెట్‌లో ధరలు మరింత పెరిగే అవకాశం ఉందని విశ్లేషకులు అంచనా వేస్తున్నారు