అమెరికాలోని హవాయిలో భూకంపం.. రిక్టర్ స్కేల్‌పై 6.0గా నమోదు

అమెరికాలోని హవాయి దీవిలో భారీ భూకంపం సంభవించింది. రిక్టర్ స్కేల్‌పై దీని తీవ్రత 6.0గా నమోదైంది. అయితే, ఈ భూకంపం కారణంగా ఎలాంటి సునామీ ముప్పు లేదని అధికారులు స్పష్టం చేయడంతో ప్రజలు ఊపిరి పీల్చుకున్నారు.

యునైటెడ్ స్టేట్స్ జియోలాజికల్ సర్వే (USGS) వెల్లడించిన వివరాల ప్రకారం హవాయిలోని బిగ్ ఐలాండ్‌లో ఉన్న హోనౌనౌ-నాపూపూకు దక్షిణంగా 12 కిలోమీటర్ల దూరంలో శుక్రవారం రాత్రి 9:46 గంటలకు ఈ భూకంపం వచ్చింది. భూమికి 22.4 కిలోమీటర్ల లోతులో భూకంప కేంద్రం ఉన్నట్లు గుర్తించారు.

భూ ప్రకంపనల ప్రభావం హవాయి దీవుల వ్యాప్తంగా విస్తృతంగా కనిపించింది. అయితే, సమీపంలోని మౌనా లోవా, కిలాయు అగ్నిపర్వతాలపై ఎలాంటి ప్రభావం పడలేదని యూఎస్‌జీఎస్ ఒక ప్రకటనలో తెలిపింది. హవాయి కౌంటీ మేయర్ కిమో అలమేడా కూడా మాట్లాడుతూ ఈ భూకంపం వల్ల సునామీ వచ్చేంత ప్రమాదం లేదని స్పష్టం చేశారు. పసిఫిక్ సునామీ హెచ్చరికల కేంద్రం కూడా ఎలాంటి హెచ్చరికలు జారీ చేయలేదు.

రాబోయే రోజుల్లో చిన్నపాటి ప్రకంపనలు కొనసాగే అవకాశం ఉందని అధికారులు తెలిపారు. హవాయి ప్రాంతంలో ఒక మోస్తరు భూకంపాలు సర్వసాధారణమని, గత 50 ఏళ్లలో ఈ ప్రాంతంలో 5.0 కంటే ఎక్కువ తీవ్రతతో 36 భూకంపాలు నమోదయ్యాయని యూఎస్‌జీఎస్ పేర్కొంది.