ఆర్గానిక్ పద్ధతిలో అవకాడోలు పండిస్తున్న సునీల్ శెట్టి!

బాలీవుడ్ సీనియర్ నటుడు సునీల్ శెట్టి ఆరోగ్యకరమైన జీవనశైలి కోసం సేంద్రీయ బాట పట్టారు. తన ఫామ్‌హౌస్‌లో సేంద్రీయ వ్యవసాయం చేస్తూ ప్రకృతితో మమేకమవుతున్నారు. గురువారం తన ఇన్‌స్టాగ్రామ్‌లో ఫామ్‌లోని అవకాడో చెట్ల వీడియోను పంచుకున్నారు. "చెట్లపై పెరిగేదే అసలైన సంపద. ఇంట్లో పండించిన అవకాడోలు. గ్రీన్ థెరపీ. స్వచ్ఛమైన ఆనందం" అని ఆ వీడియోకు క్యాప్షన్ జోడించారు.

గత కొంతకాలంగా తన ఫిట్‌నెస్, ఆరోగ్యకరమైన జీవనశైలితో సునీల్ శెట్టి ప్రేక్షకులను ఆకట్టుకుంటున్న విషయం తెలిసిందే. ఇటీవల మనవరాలు ఎవారా పుట్టిన తర్వాత ఆయన ఆరోగ్యంపై మరింత శ్రద్ధ పెట్టినట్లు తెలుస్తోంది. సునీల్ కుమార్తె అతియా శెట్టి, భారత టెస్ట్ క్రికెట్ జట్టు వైస్ కెప్టెన్ కేఎల్ రాహుల్ దంపతులకు ఎవారా మొదటి సంతానం.

ఇదిలా ఉండగా, ఇటీవల మాతృదినోత్సవం సందర్భంగా సునీల్ శెట్టి కుమారుడు, నటుడు అహాన్ శెట్టి తన తల్లి మానా శెట్టి గురించి రాసిన ఓ ఎమోషనల్ పోస్ట్ అందరినీ ఆకట్టుకుంది. "నాకు అత్యంత బలం, సురక్షితమైన ప్రదేశం నువ్వే. నా నుంచి ఏమీ ఆశించకుండా నన్ను ప్రేమించే ఏకైక వ్యక్తివి అమ్మ. హ్యాపీ మదర్స్ డే" అంటూ అహాన్ తన ఇన్‌స్టాగ్రామ్‌లో రాసుకొచ్చాడు. ఎంత పెద్దవాడినైనా తనకు ఎప్పుడూ తల్లి అవసరం ఉంటుందని అహాన్ భావోద్వేగంగా పేర్కొన్నాడు.

ఈ పోస్ట్‌కు సునీల్ శెట్టి రెడ్ హార్ట్, దిష్టి చుక్క ఎమోజీలతో స్పందించగా, ఆయన కుమార్తె అతియా శెట్టి కూడా రెడ్ హార్ట్ ఎమోజీని కామెంట్ సెక్షన్‌లో పోస్ట్ చేసింది.