ముగిసిన నిత్యానందరెడ్డి పోలీస్ కస్టడీ.. కడప సెంట్రల్ జైలుకు తరలింపు

వైసీపీ నేత, కడప మాజీ డిప్యూటీ మేయర్ నిత్యానందరెడ్డి రెండు రోజుల పోలీస్ కస్టడీ ముగిసింది. రియల్ ఎస్టేట్ వ్యాపారి పెద్ద దస్తగిరి హత్య కేసులో ప్రధాన నిందితుడిగా ఉన్న ఆయనను కోర్టు అనుమతితో చిన్నచౌక్ పోలీసులు రెండు రోజుల పాటు తమ కస్టడీలోకి తీసుకుని సుదీర్ఘంగా విచారించారు. ప్రస్తుతం కడప సెంట్రల్ జైలులో రిమాండ్ ఖైదీగా ఉన్న నిత్యానందరెడ్డిని, ఈ కేసులో పట్టుబడిన ఇతర నిందితులు ఇచ్చిన వాంగ్మూలం ఆధారంగా పోలీసులు ప్రశ్నించారు. ముఖ్యంగా పెద్ద దస్తగిరి హత్య జరిగిన తర్వాత నిందితులు సురక్షితంగా పారిపోయేందుకు వెనుక ఉండి సహకరించారనే కోణంలో పోలీసులు కీలక వివరాలు సేకరించినట్లు తెలుస్తోంది.

పోలీసుల ప్రాథమిక విచారణలో మృతుడు పెద్ద దస్తగిరికి, నిత్యానందరెడ్డికి మధ్య గత కొంతకాలంగా నడుస్తున్న వివాదాస్పద భూ లావాదేవీల వివాదం గురించిన సమాచారం బయటకు వచ్చినట్లు సమాచారం. అంతేకాకుండా, ఈ దారుణ హత్య వెనుక కేవలం పట్టుబడిన వారే కాకుండా, ఇంకొందరి పాత్ర కూడా ఉన్నట్టు పోలీసు విచారణలో తేలినట్టు సమాచారం. రెండు రోజుల విచారణ ప్రక్రియ పూర్తి కావడంతో, పోలీసులు నిత్యానంద రెడ్డిని మొబైల్ కోర్టు జడ్జి ముందు ప్రవేశపెట్టారు. న్యాయమూర్తి ఆదేశాల మేరకు భద్రత నడుమ ఆయనను తిరిగి కడప సెంట్రల్ జైలుకు తరలించారు.