వినుకొండ ప్రభుత్వ ఆసుపత్రిలో పేలిన ఏసీ.. తప్పిన పెను ప్రమాదం

పల్నాడు జిల్లా వినుకొండ ప్రభుత్వ ఆసుపత్రిలో మంగళవారం పెను ప్రమాదం తప్పింది. ఆసుపత్రిలోని కొత్త భవనంలో ఉన్న రక్తనిధి గదిలో ఎయిర్ కండిషనర్ (ఏసీ) భారీ శబ్దంతో పేలిపోయింది. ఈ ఘటనతో రోగులు, సిబ్బంది తీవ్ర భయాందోళనకు గురయ్యారు. అయితే, ప్రమాదం జరిగినప్పుడు గదిలో ఎవరూ లేకపోవడంతో ఎవరికీ గాయాలు కాలేదు. దీంతో అధికార యంత్రాంగం, ఆసుపత్రి సిబ్బంది ఊపిరి పీల్చుకున్నారు.

మంగళవారం ఏసీ పేలడంతో గది మొత్తం దట్టమైన పొగతో నిండిపోయింది. భారీ శబ్దం విన్న సిబ్బంది వెంటనే అప్రమత్తమై విద్యుత్ సరఫరాను నిలిపివేశారు. ఈ పేలుడులో ఏసీ పూర్తిగా కాలిపోగా, గదిలోని ఇతర విలువైన పరికరాలు కూడా దెబ్బతిన్నాయి. అయితే, సోమవారం సాయంత్రానికే రక్త నిల్వలు అయిపోవడంతో ఎలాంటి నష్టం జరగలేదని అధికారులు తెలిపారు. పేలుడుకు కేవలం 15 నిమిషాల ముందే టెక్నీషియన్ ఏసీని పరిశీలించి వెళ్లారని ఆసుపత్రి సూపరింటెండెంట్ దయానిధి వెల్లడించడం గమనార్హం.

సమాచారం అందుకున్న జిల్లా ఆసుపత్రుల సేవల సమన్వయకర్త (డీసీహెచ్‌ఎస్) డాక్టర్ ప్రసూన ఘటనా స్థలాన్ని పరిశీలించారు. అధిక ఉష్ణోగ్రతల కారణంగా ఏసీ నిరంతరం 24 గంటలు పనిచేయడంతోనే ఈ ప్రమాదం జరిగి ఉండవచ్చని ప్రాథమికంగా భావిస్తున్నారు. ఆసుపత్రి వైరింగ్ వ్యవస్థను పూర్తిగా తనిఖీ చేయాలని విద్యుత్ శాఖ అధికారులను ఆదేశించారు. ఘటనపై పూర్తిస్థాయి దర్యాప్తు తర్వాతే అసలు కారణాలు తెలుస్తాయని అధికారులు తెలిపారు.