తండ్రి సంపాదించిన ఆస్తిపై కూతురికి హక్కు ఉంటుందా? నిపుణులు ఏం చెబుతున్నారంటే...!

ఒక వ్యక్తి తన జీవితకాలంలో సంపాదించుకున్న ఆస్తి (స్వార్జితం)పై పూర్తి హక్కులు ఆయనకే ఉంటాయి. ఆ ఆస్తిని తన ఇష్టానుసారం ఎవరికైనా అమ్మవచ్చు, బహుమతిగా ఇవ్వవచ్చు లేదా వీలునామా ద్వారా రాసివ్వొచ్చు. ఆయన జీవించి ఉండగా చేసిన ఇటువంటి లావాదేవీలను, ఆయన మరణానంతరం వారసులు ప్రశ్నించడానికి చట్టపరంగా అవకాశం ఉండదని నిపుణులు స్పష్టం చేస్తున్నారు.

ఒడిశాకు చెందిన ఒక మహిళ అడిగిన ప్రశ్నకు ఆర్థిక నిపుణులు ఈ మేరకు సమాధానమిచ్చారు. ఆ మహిళ తెలిపిన వివరాల ప్రకారం.. ఆమె తండ్రి తన స్వార్జితమైన భూమిని 2005లో ఆమెకు తెలియకుండానే ఇద్దరు కుమారులకు అమ్మేశారు. ఆ స్థలంలో వారు ఇల్లు కట్టుకుని నివసిస్తున్నారు. అయితే, 2015లో తండ్రి మరణించగా, ఈ అమ్మకం విషయం ఆమెకు ఇటీవల తెలిసింది. ఇప్పుడు ఆ ఆస్తిలో తనకు వాటా వస్తుందా అని ఆమె ప్రశ్నించారు.

దీనిపై నిపుణులు స్పందిస్తూ, హిందూ చట్టం ప్రకారం స్వార్జితంపై యజమానికి సర్వ హక్కులు ఉంటాయని తెలిపారు. తండ్రి తన జీవితకాలంలోనే ఆ భూమిని అమ్మేసినందున, ఆ లావాదేవీని సవాలు చేసే హక్కు కుమార్తెకు ఉండదని స్పష్టం చేశారు. ఒకవేళ ఆ భూమిని ఆయన కుమారులకు బహుమతిగా ఇచ్చినా లేదా వీలునామా రాసినా కూడా ఆమె అభ్యంతరం చెప్పే వీలుండేది కాదన్నారు.

అయితే, తండ్రి ఎలాంటి వీలునామా రాయకుండా మరణించి (intestate) ఉంటే, ఆయన పేరు మీద ఉన్న ఇతర ఆస్తులలో మాత్రం కుమార్తె తన వాటాను చట్టపరంగా క్లెయిమ్ చేసుకోవచ్చని నిపుణులు సూచించారు