మంచు మనోజ్, మౌనిక దంపతుల కొత్త ప్రయాణం.. "ఐక్య"కు శ్రీకారం

టాలీవుడ్ నటుడు మంచు మనోజ్, ఆయన భార్య భూమా మౌనిక రెడ్డి సామాజిక సేవా రంగంలోకి అడుగుపెట్టారు. తమ పుట్టినరోజుల వేడుకలకు ముందుగా సామాజిక సేవతో కొత్త ప్రయాణాన్ని ప్రారంభించాలని నిర్ణయించుకున్న ఈ దంపతులు 'ఐక్య... ధైర్య సేన సమితి' అనే స్వచ్ఛంద సంస్థను ప్రారంభించారు. ఈ విషయాన్ని మంచు మనోజ్ స్వయంగా ప్రకటిస్తూ, సంస్థ లోగోను కూడా పంచుకున్నారు.

ఈ సందర్భంగా మనోజ్ సోషల్ మీడియాలో స్పందిస్తూ.. "జీవితంలోని ఒడిదొడుకులు మాకు మానవత్వమే ముఖ్యమని నేర్పాయి. సేవ చేయాలనే స్ఫూర్తి ఈరోజు కొత్తగా మొదలైంది కాదు, అది ఎప్పుడూ మాతోనే ఉంది. ఇప్పుడు ఆ స్ఫూర్తికి ఒక పేరు పెట్టి, మాతో కలిసి నడిచేందుకు మరిన్ని హృదయాలను ఆహ్వానిస్తున్నాం" అని తెలిపారు. తన భార్య మౌనిక ఆలోచనతోనే ఈ సంస్థకు శ్రీకారం చుట్టినట్లు ఆయన భావోద్వేగంగా వెల్లడించారు.

"ఐక్య అంటే ఐకమత్యం. మానవత్వం కోసం అందరూ ఏకం కావడం. భగవంతుడు మాకు ప్రసాదించిన దానిలో కొంత భాగాన్ని సేవ రూపంలో పంచుకోవాలనుకుంటున్నాం. రక్తదానం, అత్యవసర సహాయం వంటి కార్యక్రమాల ద్వారా అవసరమైన ప్రతిచోటా 'ఐక్య' అండగా నిలుస్తుంది" అని మనోజ్ వివరించారు. ఈ సంస్థకు రాజకీయాలతో ఎలాంటి సంబంధం లేదని, మానవత్వంపై నమ్మకం ఉన్న ప్రతి ఒక్కరిదీ అని ఆయన స్పష్టం చేశారు. ఒక ఉన్నతమైన లక్ష్యం కోసం మనసులు కలిసినప్పుడు మార్పు మాత్రమే కాదు, కొత్త ఆశ కూడా పుడుతుందని ఆయన ఆకాంక్షించారు.