టీ20 క్రికెట్‌లో సాయి సుదర్శన్ ప్రపంచ రికార్డు.. గేల్, కాన్వే వెనక్కి!

యువ సంచలనం, గుజరాత్ టైటాన్స్ ఓపెనర్ సాయి సుదర్శన్ తన అద్భుత ఫామ్‌ను కొనసాగిస్తూ సరికొత్త చరిత్ర సృష్టించాడు. శనివారం కోల్‌కతా నైట్ రైడర్స్‌తో జరిగిన మ్యాచ్‌లో అద్భుత అర్ధశతకంతో మెరిసిన అతడు టీ20 ఫార్మాట్‌లో అత్యంత వేగంగా 3000 పరుగులు పూర్తి చేసిన ఆటగాడిగా ప్రపంచ రికార్డు నెలకొల్పాడు. ఈ క్రమంలో షాన్ మార్ష్, క్రిస్ గేల్ వంటి దిగ్గజాలను వెనక్కి నెట్టాడు.

ఈడెన్ గార్డెన్స్‌లో జరిగిన ఈ మ్యాచ్‌లో సాయి సుదర్శన్ కేవలం 78 ఇన్నింగ్స్‌ల్లోనే 3000 పరుగుల మైలురాయిని చేరుకున్నాడు. ఇప్పటివరకు ఈ రికార్డు ఆస్ట్రేలియా బ్యాటర్ షాన్ మార్ష్ పేరిట ఉండేది. మార్ష్ 85 ఇన్నింగ్స్‌ల్లో ఈ ఘనత సాధించాడు. సాయి సుదర్శన్.. డెవాన్ కాన్వే (86), డార్సీ షార్ట్ (86), యూనివర్సల్ బాస్ క్రిస్ గేల్ (87) కంటే వేగంగా ఈ మైలురాయిని అందుకోవడం విశేషం.

ఇదే మ్యాచ్‌లో సాయి సుదర్శన్ మరో అరుదైన ఘనతను కూడా తన ఖాతాలో వేసుకున్నాడు. కేకేఆర్‌పై 28 బంతుల్లో 53 పరుగులతో అజేయంగా నిలిచిన అతను, గుజరాత్ టైటాన్స్ తరఫున వరుసగా నాలుగో అర్ధశతకం నమోదు చేశాడు. ఫ్రాంచైజీ చరిత్రలో ఇప్పటివరకు ఏ ఆటగాడు ఈ ఘనత సాధించలేదు. గతంలో హార్దిక్ పాండ్య (2022), శుభ్‌మన్ గిల్ (2025, 2026), స్వయంగా సాయి సుదర్శన్ (2024-25) మూడేసి అర్ధశతకాలతో సమంగా ఉండగా, ఇప్పుడు సాయి తన రికార్డును తానే అధిగమించాడు.

ప్రస్తుతం ఐపీఎల్ 2026 సీజన్‌లో సాయి సుదర్శన్ 13 మ్యాచ్‌ల్లో 46.17 సగటు, 157.83 స్ట్రైక్ రేట్‌తో 554 పరుగులు చేసి అగ్రస్థానంలో కొనసాగుతున్నాడు. ఆరెంజ్ క్యాప్ కూడా అతడి వద్దే ఉంది. జట్టు ఓడినప్పటికీ, తన వ్యక్తిగత ప్రదర్శనతో సాయి సుదర్శన్ అభిమానుల ప్రశంసలు అందుకుంటున్నాడు.