విరాట్ కోహ్లీ అజేయ శతకం.. మళ్లీ పాయింట్ల పట్టికలో అగ్రస్థానానికి బెంగళూరు

ఐపీఎల్ 2026లో రాయల్ ఛాలెంజర్స్ బెంగళూరు (ఆర్సీబీ) అద్భుత విజయాన్ని నమోదు చేసింది. స్టార్ బ్యాటర్ విరాట్ కోహ్లీ (60 బంతుల్లో 105 నాటౌట్) అజేయ శతకంతో కదం తొక్కడంతో బుధవారం జరిగిన మ్యాచ్‌లో కోల్‌కతా నైట్‌రైడర్స్‌ (కేకేఆర్)పై 6 వికెట్ల తేడాతో గెలుపొందింది. ఈ విజయంతో ఆర్సీబీ తిరిగి పాయింట్ల పట్టికలో అగ్రస్థానాన్ని కైవసం చేసుకుంది. కోల్‌కతా వరుస నాలుగు విజయాల పరంపరకు ఈ ఓటమితో తెరపడింది.

రాయ్‌పూర్‌లోని షహీద్ వీర్ నారాయణ్ సింగ్ స్టేడియంలో వర్షం కారణంగా 75 నిమిషాలు ఆలస్యంగా ప్రారంభమైన ఈ మ్యాచ్‌లో కేకేఆర్ నిర్దేశించిన 193 పరుగుల భారీ లక్ష్యాన్ని ఆర్సీబీ 19.1 ఓవర్లలో 4 వికెట్లు కోల్పోయి ఛేదించింది. ఛేదనలో కోహ్లీ ఆద్యంతం నిలబడి జట్టును విజయతీరాలకు చేర్చాడు. 11 ఫోర్లు, 3 సిక్సర్లతో వింటేజ్ ఇన్నింగ్స్ ఆడిన కోహ్లీ.. ఐపీఎల్‌లో తన 9వ సెంచరీని, ఓవరాల్‌గా టీ20ల్లో 10వ శతకాన్ని పూర్తి చేసుకున్నాడు. దేవదత్ పడిక్కల్ (39)తో కలిసి రెండో వికెట్‌కు 92 పరుగుల కీలక భాగస్వామ్యం నెలకొల్పి గెలుపునకు బలమైన పునాది వేశాడు.

అంతకుముందు బ్యాటింగ్ చేసిన కోల్‌కతా నైట్‌రైడర్స్ నిర్ణీత 20 ఓవర్లలో 4 వికెట్ల నష్టానికి 192 పరుగులు చేసింది. యువ బ్యాటర్ అంగ్‌క్రిష్ రఘువంశీ (46 బంతుల్లో 71), చివర్లో రింకూ సింగ్ (29 బంతుల్లో 49 నాటౌట్) మెరుపు ఇన్నింగ్స్ ఆడటంతో కేకేఆర్ భారీ స్కోరు సాధించింది. ఆర్సీబీ బౌలర్లలో భువనేశ్వర్ కుమార్, జోష్ హేజిల్‌వుడ్, రసిఖ్ సలామ్ తలో వికెట్ పడగొట్టారు.

భారీ లక్ష్య ఛేదనలో పడిక్కల్, రజత్ పటిదార్, టిమ్ డేవిడ్ వికెట్లు కోల్పోయినా కోహ్లీ ఒంటరి పోరాటంతో జట్టును ముందుకు నడిపించాడు. చివరి ఓవర్‌లో మూడు పరుగులు అవసరం కాగా, జితేశ్ శర్మ ఫోర్ కొట్టి లాంఛనాన్ని పూర్తి చేశాడు. కేకేఆర్ బౌలర్లలో కార్తీక్ త్యాగి 3 వికెట్లు పడగొట్టినా, కోహ్లీ అద్భుత బ్యాటింగ్ ముందు వారి ప్రదర్శన సరిపోలేదు. ఈ విజయంతో ఆర్సీబీ పట్టికలో తన ఆధిపత్యాన్ని తిరిగి నిలబెట్టుకుంది.