కవిత పార్టీ పెట్టడానికి ఇంటి గొడవలే కారణం: దానం నాగేందర్
- కేసీఆర్ ను కవిత రోబోలా అభివర్ణించడాన్ని తప్పుబట్టిన దానం
- కుటుంబ వివాదాల వల్లే కవిత కొత్త రాజకీయ ప్రయాణాన్ని ఆరంభించారని వ్యాఖ్య
- కాంగ్రెస్ పాలనలో తెలంగాణ దేశానికే ఆదర్శంగా నిలిచిందన్న దానం
టీఆర్ఎస్ (తెలంగాణ రాష్ట్ర సేన) అధినేత్రి కల్వకుంట్ల కవితపై ఖైరతాబాద్ ఎమ్మెల్యే దానం నాగేందర్ ఘాటు వ్యాఖ్యలు చేశారు. కవిత కొత్త పార్టీ పెట్టడం వెనుక రాజకీయ కారణాల కంటే ఆమె 'ఇంటి గొడవలే' ప్రధాన కారణమని ఆయన అన్నారు.
కవిత తన కన్నతండ్రిని (కేసీఆర్) ఒక రోబోలా అభివర్ణించడాన్ని దానం నాగేందర్ తప్పుబట్టారు. కుటుంబ సభ్యుల మధ్య ఉన్న విభేదాల వల్లే ఆమె కొత్త రాజకీయ ప్రయాణాన్ని ప్రారంభించారని చెప్పారు. రాష్ట్రంలో రాక్షస పాలన నడుస్తోందని ఆమె చేస్తున్న విమర్శల్లో వాస్తవం లేదని మండిపడ్డారు. కాంగ్రెస్ ప్రభుత్వంలోని తెలంగాణ దేశానికే ఆదర్శంగా నిలుస్తోందని, సంక్షేమ పథకాలు ప్రజలకు చేరువవుతున్నాయని ఆయన అన్నారు.
ప్రజా సంక్షేమం గురించి మాట్లాడుతూ, త్వరలోనే ప్రతి నియోజకవర్గానికి 3,500 ఇందిరమ్మ ఇళ్లను మంజూరు చేయబోతున్నట్లు ఈ సందర్భంగా ఆయన ప్రకటించారు. కేవలం విమర్శలకే పరిమితం కాకుండా, పేదల సొంతింటి కలను నెరవేర్చేందుకు ప్రభుత్వం సిద్ధంగా ఉందన్నారు. ఈ కార్యక్రమంలో తహసీల్దార్లతో పాటు పలువురు స్థానిక నాయకులు పాల్గొన్నారు.