ఫ్యాన్స్‌తో కలిసి పుట్టినరోజు వేడుకలు జరుపుకున్న సమంత

స్టార్ హీరోయిన్ సమంత తన పుట్టినరోజును అభిమానుల మధ్య ఘనంగా జరుపుకున్నారు. హైదరాబాద్‌లో జరిగిన ఈ వేడుకలో ఆమె ఫ్యాన్స్‌తో కలిసి కేక్ కట్ చేశారు. దర్శకుడు రాజ్ నిడిమోరుతో వివాహం తర్వాత ఆమెకు ఇది తొలి పుట్టినరోజు కావడం విశేషం. చాలా కాలం తర్వాత సమంత తన అభిమానులతో నేరుగా సమయం గడపడం ఈ వేడుకకు ప్రత్యేకతను తెచ్చిపెట్టింది.

అభిమానుల మధ్య ఎంతో ఆనందంగా కనిపించిన సమంత, వారితో సరదాగా మాట్లాడుతూ ఫొటోలకు పోజులిచ్చారు. ఈ వేడుకకు సంబంధించిన ఫోటోలు, వీడియోలు సోషల్ మీడియాలో ప్రస్తుతం వైరల్ అవుతున్నాయి. తన వ్యక్తిగత జీవితంలో కొత్త అధ్యాయం ప్రారంభమైన తర్వాత అభిమానులతో ఇలా మమేకం కావడం పట్ల ఫ్యాన్స్ ఆనందం వ్యక్తం చేస్తున్నారు.

ఈ సందర్భంగా సమంతకు సినీ పరిశ్రమ నుంచి శుభాకాంక్షలు వెల్లువెత్తాయి. నయనతార తన ఇన్‌స్టాగ్రామ్ స్టోరీలో "పుట్టినరోజు శుభాకాంక్షలు స్వీటెస్ట్ గర్ల్" అని పేర్కొనగా, నటి వరలక్ష్మి శరత్‌కుమార్ "నువ్వు ఎప్పటికీ మా ఇంటి బంగారం" అంటూ ప్రేమగా విష్ చేశారు. కాజల్ అగర్వాల్, రకుల్ ప్రీత్ సింగ్ వంటి పలువురు తారలు ఆమెకు విషెస్ తెలిపారు.

ఇదే సమయంలో సమంత నటిస్తూ, నిర్మిస్తున్న 'మా ఇంటి బంగారం' చిత్రం మరోసారి వార్తల్లో నిలిచింది. 'ఓ బేబీ' తర్వాత నందిని రెడ్డి దర్శకత్వంలో వస్తున్న ఈ ఫ్యామిలీ యాక్షన్ కామెడీ చిత్రానికి రాజ్ నిడిమోరు, హిమాంక్ దువ్వూరు సహ నిర్మాతలుగా వ్యవహరిస్తున్నారు. ఈ సినిమా మే 15న ప్రపంచవ్యాప్తంగా థియేటర్లలో విడుదల కానుంది.