పొగతాగని యువతలో ఊపిరితిత్తుల క్యాన్సర్.. ఆహారమే కారణమా?

ఆరోగ్యంగా ఉండటానికి మనం తీసుకునే పండ్లు, కూరగాయలు, తృణధాన్యాలే అనారోగ్యం పాలు చేస్తున్నాయా? పొగతాగని యువతలో ఊపిరితిత్తుల క్యాన్సర్ ప్రమాదాన్ని పెంచుతున్నాయా? అంటే అవుననే అంటోంది అమెరికాలో జరిగిన ఒక కొత్త అధ్యయనం. అయితే, ఇక్కడ సమస్య ఆహార పదార్థాల్లో లేదని, సంప్రదాయ పద్ధతుల్లో పండించిన పంటలపై ఉపయోగించే పురుగుమందుల అవశేషాలే దీనికి ప్రధాన కారణమని పరిశోధకులు స్పష్టం చేస్తున్నారు.

యూనివర్సిటీ ఆఫ్ సదరన్ కాలిఫోర్నియా (యూఎస్‌సీ) పరిశోధకులు ఈ సంచలన అధ్యయనాన్ని చేశారు. 50 ఏళ్లు లేదా అంతకంటే తక్కువ వయసులో ఊపిరితిత్తుల క్యాన్సర్‌ బారినపడిన, పొగతాగని 187 మంది రోగులపై ఈ పరిశోధన జరిపారు. వీరి ఆహారపు అలవాట్లను 'హెల్తీ ఈటింగ్ ఇండెక్స్' ఆధారంగా విశ్లేషించగా, వారి సగటు స్కోరు 100కి 65గా నమోదైంది. ఇది అమెరికా జాతీయ సగటు 57 కంటే చాలా ఎక్కువ. అంటే, ఈ రోగులు సాధారణ అమెరికన్ల కంటే ఎంతో ఆరోగ్యకరమైన ఆహారం తీసుకున్నారని తేలింది.

ఈ అధ్యయనానికి నేతృత్వం వహించిన డాక్టర్ జార్జ్ నీవా మాట్లాడుతూ.. "పొగతాగని వారిలో, ముఖ్యంగా మహిళల్లో ఊపిరితిత్తుల క్యాన్సర్ కేసులు పెరగడానికి గల కారణాలను అన్వేషించాల్సిన అవసరం ఉంది. క్యాన్సర్ బారినపడిన ఈ రోగులు సగటు అమెరికన్ల కంటే ఆరోగ్యకరమైన ఆహారం తీసుకున్నట్లు మా పరిశీలనలో తేలింది" అని వివరించారు. ఆర్గానిక్ పద్ధతిలో కాకుండా సాధారణంగా పండించే పండ్లు, కూరగాయలు, తృణధాన్యాలలో పురుగుమందుల అవశేషాలు ఎక్కువగా ఉండే అవకాశం ఉందని, ఇదే ఈ అనారోగ్యానికి ఒక కారణం కావచ్చని ఆయన అభిప్రాయపడ్డారు. వ్యవసాయ కార్మికుల్లో ఊపిరితిత్తుల క్యాన్సర్ రేట్లు అధికంగా ఉండటాన్ని ఆయన ఉదాహరణగా చూపారు.

అయితే, ఈ అధ్యయనంలో పాల్గొన్నవారు స్వచ్ఛందంగా ముందుకు వచ్చినవారు కావడంతో ఫలితాల్లో కొంత పక్షపాతం ఉండే అవకాశం ఉందని డాక్టర్ నీవా అంగీకరించారు. గతంలో వాయు కాలుష్యం, హార్మోన్లను దెబ్బతీసే రసాయనాలు వంటివి క్యాన్సర్లకు కారణంగా భావించగా, ఇప్పుడు 'ఆరోగ్యకరమైన' ఆహారం ద్వారా శరీరంలోకి చేరే పురుగు మందులు కూడా మరో ప్రమాద కారకంగా ఉండొచ్చని ఈ కొత్త డేటా హెచ్చరిస్తోంది. దీనిపై మరింత లోతైన పరిశోధన జరగాల్సి ఉందని నిపుణులు చెబుతున్నారు.