శ్రీలంక టీ20 కెప్టెన్ పై పాక్ క్రికెట్ బోర్డు నిషేధం

పాకిస్థాన్ సూపర్ లీగ్ (పీఎస్ఎల్)ను మధ్యలోనే వదిలి ఇండియన్ ప్రీమియర్ లీగ్ (ఐపీఎల్)కు వెళ్లిన శ్రీలంక టీ20 కెప్టెన్ దాసున్ శనకపై పాకిస్థాన్ క్రికెట్ బోర్డు (పీసీబీ) కఠిన చర్యలు తీసుకుంది. ఒప్పంద నిబంధనలను ఉల్లంఘించినందుకు అతడిపై ఏడాది పాటు పీఎస్‌ఎల్‌లో ఆడకుండా నిషేధం విధించింది. దీనితో 2027లో జరిగే పీఎస్ఎల్ 12వ సీజన్‌లో శనక ఆడే అవకాశం లేకుండా పోయింది.

పీఎస్ఎల్ 2026 సీజన్‌లో లాహోర్ ఖలందర్స్ తరఫున శనక ఆడుతున్నాడు. ఇదే సమయంలో ఐపీఎల్ ఫ్రాంచైజీ రాజస్థాన్ రాయల్స్ జట్టులోని సామ్ కరన్ గాయం కారణంగా తప్పుకోవడంతో, అతడి స్థానంలో రూ.2 కోట్లకు శనకను జట్టులోకి తీసుకుంది. దీంతో శనక పీఎస్ఎల్ ఒప్పందాన్ని ఏకపక్షంగా రద్దు చేసుకుని ఐపీఎల్‌లో చేరాడు.

ఈ పరిణామంపై సమీక్ష నిర్వహించిన పీసీబీ, శనక చర్య ఒప్పంద ఉల్లంఘన కిందకే వస్తుందని తేల్చింది. టోర్నమెంట్ ప్రతిష్టను కాపాడేందుకు ఈ చర్యలు తప్పవని స్పష్టం చేసింది. అయితే, తన నిర్ణయంపై శనక తీవ్ర పశ్చాత్తాపాన్ని వ్యక్తం చేసినట్లు పీసీబీ తెలిపింది. "పీఎస్ఎల్ నుంచి వైదొలిగినందుకు క్షమాపణలు కోరుతున్నాను. పాకిస్థాన్ అభిమానులను నేను గౌరవిస్తాను," అని శనక పేర్కొన్నట్లు వెల్లడించింది.

ఇటీవల ఇదే తరహాలో జింబాబ్వే పేసర్ బ్లెస్సింగ్ ముజరబానీపై కూడా ఐపీఎల్ కోసం పీఎస్‌ఎల్‌ను వదిలేశాడనే కారణంతో పీసీబీ రెండేళ్ల నిషేధం విధించడం గమనార్హం.