రోబో శునకంపై ఎలాన్ మస్క్ తల... చూసి షాకైన జనం.. వీడియో ఇదిగో!

అమెరికాలోని శాన్‌ఫ్రాన్సిస్కో వీధుల్లో ఓ వింత దృశ్యం అందరినీ ఆశ్చర్యపరిచింది. ఎలాన్ మస్క్ ముఖంతో ఉన్న ఓ నాలుగు కాళ్ల రోబో నగరంలో చక్కర్లు కొట్టింది. మనుషులకు అభివాదం చేయడం, కాళ్లు పైకెత్తి పలకరించడం, ఎదురైన నిజమైన కుక్కలకు మొరగడం వంటి పనులు చేస్తూ అందరి దృష్టినీ ఆకర్షించింది. డిజిటల్ ఆర్టిస్ట్ బీపుల్ (అసలు పేరు మైక్ వింకెల్‌మన్) తన కొత్త ఆర్ట్ ఎగ్జిబిషన్ ప్రచారం కోసం ఈ రోబోలను ప్రదర్శనకు ఉంచినట్లు తెలిసింది.

పాలో ఆల్టోలోని 'NODE' అనే డిజిటల్ ఆర్ట్స్ సెంటర్‌లో "రెగ్యులర్ యానిమల్స్" పేరుతో బీపుల్ ఈ ప్రదర్శనను ఏర్పాటు చేశారు. ఈ ప్రాజెక్టులో భాగంగా కేవలం మస్క్ మాత్రమే కాకుండా ఫేస్‌బుక్ వ్యవస్థాపకుడు మార్క్ జుకర్‌బర్గ్, అమెజాన్ అధిపతి జెఫ్ బెజోస్, ప్రఖ్యాత చిత్రకారులు పాబ్లో పికాసో, ఆండీ వార్హోల్ వంటి ప్రముఖుల ముఖాలతో కూడా రోబోలను సృష్టించారు. అయితే, శాన్‌ఫ్రాన్సిస్కో వీధుల్లో మాత్రం మస్క్, జుకర్‌బర్గ్ ముఖాలున్న రోబోలనే ప్రదర్శించారు. వీటిని చూసేందుకు జనం ఆసక్తి చూపించారు.

'యూనిట్రీ గో2' అనే క్వాడ్రుపెడ్ రోబో బాడీకి, మనిషి ముఖంలా కనిపించే హైపర్‌ఫ్లెష్ సిలికాన్ మాస్క్‌ను అమర్చి ఈ రోబోలను తయారు చేశారు. ఈ రోబోలను మూడేళ్ల పాటు సజీవంగా ఉంచుతామని, ఆ తర్వాత అవి 'చనిపోతాయని', వాటి జ్ఞాపకాలను భద్రపరుస్తామని సృష్టికర్తలు చెప్పడం గమనార్హం.

ఈ వింత రోబోలపై సోషల్ మీడియాలో మిశ్రమ స్పందనలు వ్యక్తమవుతున్నాయి. కొందరు దీనిని "అద్భుతం", "సరదాగా ఉంది" అని ప్రశంసించగా, మరికొందరు "వికారంగా", "ఇబ్బందికరంగా ఉంది" అని విమర్శించారు. దీనిపై NODE సెంటర్ ప్రతినిధి ఫిల్ మోహన్ మాట్లాడుతూ.. "ప్రజల దృష్టిని ఆకర్షించి, వారి మధ్య చర్చ జరిగేలా చేయాలనేది బీపుల్ కళ ముఖ్య ఉద్దేశం. ఈ రోబోలు ఆ పనిని విజయవంతంగా చేస్తున్నాయి. డిజిటల్ సంస్కృతిని ప్రజల్లోకి తీసుకెళ్లడంలో భాగంగానే ఈ ప్రదర్శన ఏర్పాటు చేశాం" అని వివరించారు. "INFINITE_LOOP" పేరుతో జరుగుతున్న ఈవెంట్‌లో భాగంగా ఈ రోబోలను ప్రదర్శిస్తున్నారు. అయితే, ఈ రోబోల కోసం మస్క్, జుకర్‌బర్గ్ అనుమతి తీసుకున్నారా? లేదా? అన్న విషయంపై స్పష్టత లేదు.