ఆసియా కుబేరుడిగా గౌతమ్ అదానీ.. అంబానీని వెనక్కి నెట్టారు!

ప్రముఖ పారిశ్రామికవేత్త, అదానీ గ్రూప్ ఛైర్మన్ గౌతమ్ అదానీ మరోసారి ఆసియాలోనే అత్యంత సంపన్న వ్యక్తిగా అవతరించారు. ఈ క్రమంలో ఆయన రిలయన్స్ ఇండస్ట్రీస్ ఛైర్మన్ ముఖేశ్‌ అంబానీని అధిగమించారు. బ్లూమ్‌బర్గ్ బిలియనీర్స్ ఇండెక్స్ విడుదల చేసిన తాజా జాబితాలో ఈ మార్పు చోటుచేసుకుంది. తాజా గణాంకాల ప్రకారం గౌతమ్ అదానీ నికర సంపద 92.6 బిలియన్ డాలర్లకు చేరగా, ఆయన ప్రపంచ కుబేరుల జాబితాలో 19వ స్థానంలో నిలిచారు. మరోవైపు 90.8 బిలియన్ డాలర్ల సంపదతో ముఖేశ్‌ అంబానీ 20వ స్థానానికి పరిమితమయ్యారు.

గురువారం స్టాక్ మార్కెట్లలో అదానీ గ్రూప్ కంపెనీల షేర్లు భారీగా లాభపడటంతో అదానీ సంపద ఒక్కరోజే సుమారు 3.56 బిలియన్ డాలర్లు పెరిగింది. శుక్రవారం కూడా అదానీ టోటల్ గ్యాస్, అదానీ పోర్ట్స్, అదానీ పవర్ వంటి షేర్లు 3 శాతం వరకు లాభాలతో ట్రేడ్ అయ్యాయి. 2026లో ప్రపంచ మార్కెట్లలో నెలకొన్న అస్థిరతల నేపథ్యంలో సంపన్నుల ర్యాంకింగ్‌లు వేగంగా మారుతుండటం గమనార్హం.

ప్రపంచ కుబేరుల జాబితాలో టెస్లా సీఈఓ ఎలాన్ మస్క్ 656 బిలియన్ డాలర్ల సంపదతో అగ్రస్థానంలో కొనసాగుతున్నారు. ఆయన తర్వాత గూగుల్ సహ వ్యవస్థాపకుడు లారీ పేజ్ (286 బిలియన్ డాలర్లు) ఉన్నారు. ఇక ఇతర భారతీయ బిలియనీర్లలో లక్ష్మీ మిట్టల్ 62వ స్థానంలో, శివ్ నాడార్ 70వ స్థానంలో, షాపూర్ మిస్త్రీ 71వ స్థానంలో, సావిత్రి జిందాల్ 73వ స్థానంలో నిలిచారు.