8వ పే కమిషన్ ముందు కీలక ప్రతిపాదన... ఉద్యోగుల కనీస వేతనం రూ.18,000 నుంచి రూ.69,000కు పెంపు!

8వ వేతన సంఘం ఏర్పాటు నేపథ్యంలో కేంద్ర ప్రభుత్వ ఉద్యోగుల కనీస వేతనాన్ని భారీగా పెంచాలనే కీలక ప్రతిపాదన తెరపైకి వచ్చింది. ఉద్యోగ సంఘాల తరఫున ప్రభుత్వంతో చర్చలు జరిపే అత్యున్నత సంస్థ అయిన నేషనల్ కౌన్సిల్-జాయింట్ కన్సల్టేటివ్ మెషినరీ (NC-JCM), 8వ పే కమిషన్‌కు సమర్పించిన మెమోరాండంలో ఈ డిమాండ్‌ను ఉంచింది.

ప్రస్తుతం 7వ వేతన సంఘం సిఫార్సుల ప్రకారం ఉన్న రూ.18,000 కనీస వేతనాన్ని ఏకంగా రూ.69,000కు పెంచాలని NC-JCM డిమాండ్ చేసింది. ఇందుకోసం ఫిట్‌మెంట్ ఫ్యాక్టర్‌ను 3.833గా నిర్ణయించాలని సూచించింది. 7వ వేతన సంఘంలో ఈ ఫ్యాక్టర్ 2.57గా ఉండగా, అప్పటి కనీస వేతనం రూ.7,000 నుంచి రూ.18,000కు పెరిగింది. ఇప్పుడు ఉద్యోగ సంఘాలు అంతకంటే చాలా ఎక్కువ ఫిట్‌మెంట్‌ను ప్రతిపాదిస్తున్నాయి.

కనీస వేతనంతో పాటు వార్షిక ఇంక్రిమెంట్ 6 శాతంగా ఉండాలని, ప్రమోషన్‌పై రెండు ఇంక్రిమెంట్లు (కనీసం రూ.10,000 లబ్ధి) ఇవ్వాలని, ఒక నెల వేతనాన్ని గ్రాట్యుటీగా అందించాలని కూడా NC-JCM కోరింది. ఈ మార్పులు అమలైతే, దేశవ్యాప్తంగా సుమారు 50 లక్షల మంది ఉద్యోగులు, 65 లక్షల మంది పెన్షనర్లకు లబ్ధి చేకూరుతుంది.

ఇదిలా ఉండగా, 58 శాతం కరువు భత్యాన్ని (DA) బేసిక్ పేలో కలపాలని ఫెడరేషన్ ఆఫ్ నేషనల్ పోస్టల్ ఆర్గనైజేషన్స్ ప్రభుత్వాన్ని కోరుతోంది. 8వ పే కమిషన్ 2025 నవంబర్ నుంచి 18 నెలల్లోగా తన సిఫార్సులను ప్రభుత్వానికి అందిస్తుందని ఆర్థిక శాఖ సహాయ మంత్రి పంకజ్ చౌదరి గతంలో పార్లమెంటుకు తెలిపారు. దీంతో కమిషన్ సిఫార్సులపై ఉద్యోగులు, పెన్షనర్లలో తీవ్ర ఉత్కంఠ నెలకొంది.