‘జై శ్రీరామ్’ అంటే ఫీజులో రాయితీ.. డాక్టర్‌కు ఐఎంఏ షోకాజ్ నోటీసు

పశ్చిమ బెంగాల్‌కు చెందిన ఓ కార్డియాలజిస్ట్ ప్రకటించిన ఒక ఆఫర్ ఇప్పుడు తీవ్ర వివాదాస్పదంగా మారింది. ‘జై శ్రీరామ్’ అని పలికిన రోగులకు తన ఫీజులో రూ.500 తగ్గింపు ఇస్తానని డాక్టర్ ప్రకాశ్ కుమార్ హజ్రా ప్రకటించడంపై ఇండియన్ మెడికల్ అసోసియేషన్ (ఐఎంఏ) తీవ్ర ఆగ్రహం వ్యక్తం చేసింది. ఇది వైద్య వృత్తికే అవమానకరమని పేర్కొంటూ, వివరణ ఇవ్వాలని ఆయనకు షోకాజ్ నోటీసు జారీ చేసింది.

వైద్యుడి వద్దకు వచ్చే రోగి మతం, కులం లేదా రాజకీయ విశ్వాసాలతో సంబంధం లేకుండా సమానమైన చికిత్స పొందాలని ఐఎంఏ స్పష్టం చేసింది. చికిత్సలో ఇలాంటి మతపరమైన నిబంధనలు విధించడం వైద్య వృత్తి నైతికతకు పూర్తిగా విరుద్ధమని తెలిపింది. ఈ తరహా చర్యలు రోగుల మధ్య వివక్షకు దారితీస్తాయని, సమాజానికి తప్పుడు సంకేతాలు పంపుతాయని ఆందోళన వ్యక్తం చేసింది.

అయితే, ఐఎంఏ ఆగ్రహం వ్యక్తం చేసినప్పటికీ డాక్టర్ హజ్రా తన నిర్ణయాన్ని గట్టిగా సమర్థించుకుంటున్నారు. తన వ్యక్తిగత, రాజకీయ అభిప్రాయాలను వెల్లడించే హక్కు తనకుందని, ఫీజులో రాయితీ ఇవ్వడం వల్ల రోగులకు మేలే జరుగుతుందని ఆయన వాదిస్తున్నారు.

ప్రస్తుతం ఈ అంశం రాజకీయ రంగు పులుముకుంది. ఒకవైపు ఐఎంఏ క్రమశిక్షణా చర్యలకు సిద్ధమవుతుండగా, మరోవైపు రాజకీయ పార్టీలు ఈ వివాదంపై విమర్శలు, ప్రతివిమర్శలు చేసుకుంటున్నాయి.