హోమ్ గ్రౌండ్‌లో సన్‌రైజర్స్ భారీ స్కోరు... ఇక బౌలర్లపైనే భారం!

ఇండియన్ ప్రీమియర్ లీగ్ 2026లో భాగంగా సన్‌రైజర్స్ హైదరాబాద్ బ్యాటర్లు తమ హోమ్ గ్రౌండ్‌లో అదరగొట్టారు. రాజస్థాన్ రాయల్స్‌తో జరుగుతున్న మ్యాచ్‌లో బ్యాటర్లు దంచి కొట్టడంతో, ఇక బౌలర్లు తమ పని పూర్తి చేయడమే మిగిలింది. టాస్ గెలిచి బౌలింగ్ ఎంచుకున్న రాజస్థాన్ నిర్ణయం తలకిందులయ్యేలా హైదరాబాద్ బ్యాటింగ్ సాగింది. నిర్ణీత 20 ఓవర్లలో సన్‌రైజర్స్ 6 వికెట్ల నష్టానికి 216 పరుగుల భారీ స్కోరును నమోదు చేసింది. తద్వారా రాజస్థాన్ ముందు 217 పరుగుల లక్ష్యాన్ని నిర్దేశించింది.

ఉప్పల్‌లోని రాజీవ్ గాంధీ అంతర్జాతీయ స్టేడియంలో హైదరాబాద్ జట్టుకు ఇన్నింగ్స్ ఆరంభంలోనే ఎదురుదెబ్బ తగిలింది. తొలి బంతికే అభిషేక్ శర్మ (0) డకౌట్ కావడంతో రాయల్స్ శిబిరంలో ఆనందం వెల్లివిరిసింది. అయితే, ఆ సంతోషం ఎక్కువసేపు నిలవలేదు. క్రీజులోకి వచ్చిన కెప్టెన్ ఇషాన్ కిషన్, మరో ఓపెనర్ ట్రావిస్ హెడ్‌తో కలిసి ఇన్నింగ్స్‌ను చక్కదిద్దాడు. వీరిద్దరూ రెండో వికెట్‌కు 55 పరుగుల భాగస్వామ్యం నెలకొల్పారు. హెడ్ (18) నెమ్మదిగా ఆడినప్పటికీ, ఇషాన్ కిషన్ మాత్రం ఆరంభం నుంచే దూకుడు ప్రదర్శించాడు.

హెడ్ ఔటైన తర్వాత ఇషాన్ కిషన్ అసలు విశ్వరూపం చూపించాడు. రాజస్థాన్ బౌలర్లపై బౌండరీలు, సిక్సర్లతో విరుచుకుపడ్డాడు. కేవలం 44 బంతుల్లో 8 ఫోర్లు, 6 భారీ సిక్సర్లతో 91 పరుగులు చేసి, శతకానికి చేరువలో ఔటయ్యాడు. అతని బ్యాటింగ్ ధాటికి స్కోరు బోర్డు పరుగులు పెట్టింది. అనంతరం హెన్రిచ్ క్లాసెన్ (26 బంతుల్లో 40), నితీశ్ కుమార్ రెడ్డి (13 బంతుల్లో 4 సిక్సర్లతో 28), చివర్లో సలీల్ అరోరా (13 బంతుల్లో 24) మెరుపు ఇన్నింగ్స్‌లు ఆడటంతో హైదరాబాద్ స్కోరు 200 మార్కును దాటింది. సందీప్ శర్మ విసిరిన ఓ ఓవర్లో నితీశ్ 3 భారీ సిక్సులు కొట్టడం విశేషం.

రాజస్థాన్ బౌలర్లలో సందీప్ శర్మ (52), తుషార్ దేశ్‌పాండే (55) భారీగా పరుగులు సమర్పించుకున్నారు. జోఫ్రా ఆర్చర్ రెండు వికెట్లు తీసినప్పటికీ, పరుగుల వరదను అడ్డుకోలేకపోయాడు. బ్యాటర్లు తమ బాధ్యతను అద్భుతంగా నిర్వర్తించడంతో, ఇప్పుడు ఈ భారీ స్కోరును కాపాడే బాధ్యత పూర్తిగా సన్‌రైజర్స్ బౌలర్లపై పడింది.