విశాఖలో పేలిన బాణసంచా.. దద్దరిల్లిన గోపాలపట్నం

విశాఖ నగరం భారీ పేలుడుతో ఒక్కసారిగా ఉలిక్కిపడింది. గోపాలపట్నం పరిధిలోని మహాత్మా ఆదర్శనగర్‌లో ఆదివారం రాత్రి ఓ ఇంట్లో అక్రమంగా నిల్వ ఉంచిన బాణసంచా సామగ్రి పేలింది. ఈ ఘటనలో పలు ఇళ్లు ధ్వంసం కాగా, స్థానికులు భయంతో పరుగులు తీశారు. పేలుడు శబ్దం సుమారు మూడు కిలోమీటర్ల వరకు వినిపించిందంటే పరిస్థితి తీవ్రతను అర్థం చేసుకోవచ్చు.

స్థానికంగా ‘బాంబుల శివ’గా పిలిచే డి.శివకృష్ణకుమార్ (40) అనే వ్యక్తి శ్మశానవాటిక సమీపంలో ఓ ఇంటిని అద్దెకు తీసుకున్నాడు. అందులో అక్రమంగా బాణసంచా తయారు చేస్తూ విక్రయిస్తున్నాడు. ఈ నెల 18న జరగనున్న ఉత్సవాల కోసం పెద్దఎత్తున మందుగుండు సామగ్రిని నిల్వ చేశాడు. ఆదివారం రాత్రి 8 గంటల సమయంలో ఆ ఇంట్లో నుంచి దట్టమైన పొగలు వచ్చి, వెంటనే భారీ పేలుళ్లు సంభవించాయి.

ఈ పేలుడు ధాటికి భవనం గోడలు కూలిపోయి, సమీపంలోని రేకుల షెడ్లపై పడ్డాయి. చుట్టుపక్కల ఇళ్ల గోడలకు కూడా పగుళ్లు వచ్చాయి. ఇంట్లో ఉన్న ద్విచక్ర వాహనంతో పాటు ఇతర వస్తువులు ధ్వంసమయ్యాయి. శ్లాబ్ పెచ్చులు మీద పడటంతో ఓ మహిళ స్వల్పంగా గాయపడగా, ఆమెను వెంటనే ఆసుపత్రికి తరలించారు. సమాచారం అందుకున్న మర్రిపాలెం అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చారు. ప్రమాదం తర్వాత నిందితుడు శివ పరారయ్యాడు. గోపాలపట్నం సీఐ సన్యాసినాయుడు ఆధ్వర్యంలో పోలీసులు కేసు నమోదు చేసి, దర్యాప్తు చేస్తున్నారు.