శవాన్ని చూసైనా మారండి.. అంతిమయాత్రలో ఏసీపీ భావోద్వేగ ప్రసంగం.. వైర‌ల్ వీడియో!

హనుమకొండ జిల్లాలో ఓ పోలీసు ఉన్నతాధికారి చేసిన ప్రసంగం ఇప్పుడు సోషల్ మీడియాలో సంచలనంగా మారింది. ఖాకీ దుస్తుల్లో కఠినంగా కనిపించే పోలీస్ అధికారిలోని తండ్రి మనసును ఆవిష్కరించింది. మద్యం మత్తులో జరిగిన రోడ్డు ప్రమాదంలో ప్రాణాలు కోల్పోయిన ఓ యువకుడి అంతిమయాత్రలో కాజీపేట ఏసీపీ ప్రశాంత్ రెడ్డి పాల్గొని, అక్కడున్న యువతకు ఆవేదనతో చేసిన హితబోధ అందరినీ కదిలించింది. సమాజం పట్ల బాధ్యతతో ఆయన మాట్లాడిన మాటలు లక్షలాది మందిని ఆలోచింపజేస్తున్నాయి.

కాజీపేట పరిధిలో ఓ యువకుడు మద్యం సేవించి వాహనం నడుపుతూ ప్రమాదానికి గురై మరణించాడు. అతని అంతిమయాత్రలో పాల్గొన్న ఏసీపీ ప్రశాంత్ రెడ్డి, మృతుడి స్నేహితులను ఉద్దేశించి భావోద్వేగంగా ప్రసంగించారు. "క్షణకాలపు మత్తు కోసం జీవితాలను పణంగా పెడుతున్నారు. గంజాయి, మద్యం వంటి వ్యసనాలకు బానిసలై యుక్త వయసులోనే ప్రాణాలు కోల్పోతున్నారు. మీరు చనిపోతే నష్టపోయేది కేవలం మీ కుటుంబమే. కూలీనాలీ చేసి మిమ్మల్ని పెంచి పోషిస్తున్న మీ తల్లిదండ్రుల కన్నీళ్లకు ఎవరు సమాధానం చెబుతారు?" అని ఆయన ఆవేదన వ్యక్తం చేశారు.

"పుట్టినా, చచ్చినా, పార్టీల్లో గెలిచినా, ఓడినా.. అన్నింటికీ తాగడమే పనిగా పెట్టుకున్నారు. ఇది సరైన పద్ధతి కాదు. మిమ్మల్ని అభివృద్ధి మార్గంలో నడిపించేవాడే నిజమైన స్నేహితుడు. మద్యం తాగమని, గంజాయి పీల్చమని ప్రోత్సహించేవాడు స్నేహితుడు కాదు, మీ జీవితాన్ని నాశనం చేసే శత్రువు. అలాంటి చెడు స్నేహాలను వెంటనే వదిలేయండి. చనిపోయిన మీ స్నేహితుడి శవాన్ని చూసైనా మీలో మార్పు రావాలి" అంటూ హెచ్చరించారు.

ప్రతి ఒక్కరి జీవితం ఎంతో విలువైనదని, పేదరికాన్ని జయించి ఉన్నత స్థానాలకు ఎదగాలే తప్ప ఇలా అర్థాంతరంగా తనువు చాలించకూడదని హితవు పలికారు. "జీవితం ఒక్కటే, అది మళ్లీ రాదు. క్రమశిక్షణతో బతకండి. మీ తల్లిదండ్రుల కష్టాన్ని గుర్తించి, వారి ఆశలను నిలబెట్టండి" అని సూచించారు. ప్రస్తుతం ఏసీపీ ప్రశాంత్ రెడ్డి ప్రసంగానికి సంబంధించిన వీడియో నెట్టింట వైరల్ అవుతోంది. శాంతిభద్రతల పరిరక్షణే కాకుండా, సామాజిక బాధ్యతతో ఆయన స్పందించిన తీరుపై నెటిజన్లు ప్రశంసలు కురిపిస్తున్నారు. ప్రతి పోలీస్ అధికారి ఇలా స్పందిస్తే యువతలో మార్పు రావడం ఖాయమని కామెంట్లు పెడుతున్నారు.